مرکزاطلاعات فلسطین کے مطابق فلسطین میں تیسرے جمعہ کے روز لاکھوں فلسطینیوں نے نماز جمعہ کے لیے مسجد اقصیٰ آنا شروع کیا تو صہیونی فوج بوکھلاہٹ کا شکار ہوگئی۔ مغربی کنارے اور بیت المقدس کے درمیان جگہ جگہ ناکے لگا کرفلسطینیوں کو روکنے کا سلسلہ شروع کیا گیا۔ نماز جمعہ سے قبل ہزارروں فلسطینیوں کو واپس کردیا گیاتاہم اس کے باوجود دو لاکھ سے زاید افراد نے مسجد اقصیٰ میں نماز جمعہ ادا کی۔ بعض ذرائع نمازیوں کی تعداد اس سے کہیں زیادہ بتاتے ہیں۔
فلسطینی ڈائریکٹر جنرل برائے اوقاف الشیخ عزام الخطیب نے بتایا کہ نماز جمعہ کے لیے دو لاکھ سے زیادہ فلسطینی مسجد اقصیٰ پہنچنے میں کامیاب رہے تھے۔ انہوں نے بتایا کہ اسرائیلی پولیس اور فوج نے جگہ جگہ ناکے لگا کر فلسطینیوں کو روکنے کے پوری کوشش کی مگر اس کے باوجود بڑی تعداد میں فلسطینی قبلہ اول میں نماز جمعہ سے قبل پہنچ گئے تھے۔
الشیخ الخطیب کا کہنا تھا کہ اسرائیلی فوج اور پولیس کی جانب سے کھڑی کی گئی رکاوٹیں فلسطینیوں کے قبلہ اول تک پہنچنے پر اثرانداز ہوئی ہیں کیونکہ ہزاروں کی تعداد میں پولیس اہلکاروں کو بیت اور مسجد اقصیٰ کے اطراف میں متعین کیا گیا تھا۔
نماز جمعہ کی امامت ممتاز عالم دین الشیخ عکرمہ صبری نے کی۔ انہوں نے فلسطینی عوام پر زور دیا کہ وہ اسرائیلی رکاوٹوں کو توڑ کرقبلہ اول پہنچنے کی کوشش کریں۔ انہوں نے تمام ترمشکلات کے علی الرغم فلسطینیوں کا قبلہ اول تک پہنچنے کا خیر مقدم کیا اور کہا کہ فلسطینیوں کی محبت انہیں قبلہ اول تک کھنچ لانے کا ذریعہ ہے۔
بشکریہ:مرکزاطلاعات فلسطین