اسرائیلی خفیہ اداروں کی الشیخ رائد صلاح کے دفتر کی مبینہ جاسوسی

فلسطین کے سنہ 1948ء کے عرب علاقوں میں فلسطینیوں کی نمائندہ اسلامی تحریک نے انکشاف کیا ہے کہ اسرائیلی خفیہ ادارے تحریک کے سربراہ اور بزرگ فلسطینی لیڈر الشیخ رائد صلاح کے دفتر کی جاسوسی کر رہے ہیں۔
 
مرکزاطلاعات فلسطین کے مطابق اسلامی تحریک کے نائب امیرالشیخ کمال الخطیب نے ام الفحم شہر میں ایک نیوز کانفرنس سے خطاب میں کہا کہ انہیں اطلاعات ملی ہیں کہ قابض صہیونی ریاست کے خفیہ اداروں نے الشیخ رائد صلاح کے دفتر کی جاسوسی کے  لیے دفتر کے قریب ایک آلہ نصب کیا ہے۔

الشیخ کمال الخطیب نے بتایا کہ حال ہی میں ام الفحم شہرمیں الشیخ رائد صلاح کے دفتر کا موبائل فون اچانک بند ہو گیا، جس پر دفتر کی جانب سے اسرائیلی مواصلاتی کمپنی "بیزک” کے ایک ورکرکو بلایا گیا۔ اس نے چیکنگ کے دوران انکشاف کیا کہ دفتر کے اندر فون کی کیبل پر ایک آلہ نصب ہے جس مبینہ طور پر خفیہ معلومات کے حصول اور جاسوسی کے لیے استعمال کیا جاتا رہا ہے۔

اسرائیلی فوج کی جانب سے جاسوسی کے اس گھناؤنے واقعے کے منظرعام پر آنے پر اسلامی تحریک نے صہیونی ریاست کے خلاف سخت احتجاج کیا ہے۔ الشیخ کمال الخطیب کا کہنا ہے کہ اسرائیلی خفیہ ادارے ایک ایک فلسطینی شہری کو شک کی نگاہ سے دیکھتے ہیں۔ انہوں نے جاسوسی مشغلے کی شدید مذمت کی اور عالمی اداروں سے مطالبہ کیا کہ فلسطینی رہ نماؤں کو صہیونی خفیہ اداروں کی جاسوسی کی سازشوں سے بچانے کے لیے موثر اقدامات کریں۔