اسرائیلی جیلوں میں قید تمام فلسطینیوں کا بھوک ہڑتال کا فیصلہ

اسرائیلی جیلوں میں موجود تمام فلسطینی اسیران نے فیصلہ کیا ہے کہ وہ جمعرات کے روز انتظامی اسیران کی بھوک ہڑتال سے اظہار یکجہتی کے لئے ایک دن بھوک ہڑتال کریں گے۔

اسیر ابو مقاتل نے مرکز اطلاعات فلسطین کو فون پر بتایا ہے کہ تمام اسیران نے فیصلہ کیا ہے کہ وہ انتظامی اسیران سے اظہار یکجہتی کے لئے بھوک ہڑتال کریں گے۔

انہوں نے مزید بتایا کہ اسیران نے اسرائیلی جیل سروس کے ڈائریکٹر کو خبردار کیا ہے کہ اگر بھوک ہڑتالی اسیران کو کوئی نقصان پہنچا تو انہیں جیلوں میں ناگہانی صورتحال کا سامنا کرنا پڑے گا۔

اسیران نے خبردار کیا کہ اگر اسرآئیلی عدالتی نظام اور شاباک نے اسیران کے جائز مطالبات نہ مانے تو جیلوں میں احتجاج اور ہڑتالوں کا سلسلہ مزید بڑھا دیا جائے گا۔

اسی تناظر میں بیت لحم شہر کے اندر انتظامی اسیران کی حمایت میں ایک بڑی ریلی کا اہتمام کیا گیا۔ مرکز اطلاعات فلسطین کے نمائندے کے مطابق اس ریلی کا اہتمام سابق اسیران کی تنظیم نے کیا تھا اور اس میں متعدد اسیران کے خاندانوں نے شرکت کی تھی۔

بیت لحم سے تعلق رکھنے والے 13 انتظامی اسیران نے بھی انتظامی حراست کے خلاف جاری اس بھوک ہڑتال میں شرکت کررکھی ہے۔

بشکریہ:مرکزاطلاعات فلسطین