اسرائیل اور فلسطینی مزاحمت تنظیم حماس کے درمیان قیدیوں کے تبادلے کے سلسلےمیں آج منگل سےاسرائیلی جیلوں سے فلسطینیوں کی رہائی کے مراحل کا آغاز ہو گیا ہے۔
مرکز اطلاعات فلسطین کےذرائع کے مطابق منگل کو علی الصباح اسرائیل کی صحرائےنقب کی جیل”النقب” سے مغربی کنارے کے 96 اسیران کو رہا کر کے مغربی کنارے کی راہداریوں کی جانب روانہ کر دیا گیا ہے۔
ذرائع کے مطابق اسرائیلی جیلوں سے قیدیوں کے تین دیگر قافلے غزہ کو مقبوضہ فلسطینی علاقوں سے ملانے والی راہداری "کرم بو سالم ” کی جانب روانہ کیے جانے کے لیے تیار ہیں، پیش آئند لمحات میں یہ تینوں قافلے بھی روانہ کر دیےجائیں گے۔
ذرائع کےمطابق حماس اور اسرائیل کے درمیان طے پانے والے معاہدے کےمطابق تل ابیب میں مصری قونصلیٹ کے حکام رہا ہونے والے تمام اسیران کی شناخت کے بعد انہیں حماس کی فراہم کردہ فہرست کے مطابق کلیئر کر رہے ہیں۔
ادھرمرکزاطلاعات فلسطین نے مصرکی ثالثی کے تحت طے پانے والے "وفاء اسیران” ڈیل کی تیاریوں کی تمام تفصیلات مرکز اطلاعات فلسطین نے نشرکی ہیں۔ ذرائع کےمطابق اسرائیلی جیلوں میں سیکیورٹی کے سخت ترین انتظامات کیے گئے ہیں اور رہائی پانے والوں کو پولیس کی بسوں میں سوار کیا جا رہا ہے۔
ادھردوسری جانب مصر میں حماس کے سیاسی شعبے کے سربراہ خالد مشعل رہائی پانے والے فلسطینی ہیروز کے استقبال کے لیے قاہرہ میں موجود ہیں۔
حماس کے رہنما عزت رشق کا کہنا ہے کہ جن قیدیوں کو رہائی کے بعد دوسرے ممالک لے جایا جائےگا۔ اس کے لیے تیاریاں مکمل کر لی گئی ہیں۔ اس سلسلے میں اردن، ترکی اور قطر کے خصوصی طیارے فلسطینی مہمانوں کو لے جانے لیے قاہرہ میں آ چکے ہیں۔