اسرائیل کے عبرانی اخبار’’یدیعوت احرونوت‘‘ کی رپورٹ کے مطابق وزیر برائے یہودی آباد کار اورے ارئیل نے فلسطینی علاقوں میں مزید 48 مکانات کی تعمیر کی منظوری دے دی ہے۔ ان میں سے 15 مکان مقبوضہ مشرقی بیت المقدس میں اور باقی مغربی کنارے کی یہودی کالونیوں میں تعمیر کیے جائیں گے۔ حتمی منظوری کے لیے مکانات کی منظوری کی تجویز وزیراعظم نیتن یاھو کو بھیجی گئی ہے۔ وہ امریکا میں کانگریس سے خطاب کے لیے روانہ ہونے سے قبل اس کی منظوری دے دیں گے۔
ادھر دوسری جانب اسرائیل میں انسانی حقوق کے لیے کام کرنے والی ایک تنظیم’’ Now Peace ‘‘ نے اپنی رپورٹ میں بتایا ہے کہ پچھلے سال ( 2014 ء) کے فلسطین میں یہودی توسیع پسندی کا ایک نیا ریکارڈ مرتب کیا گیا ہے۔ رپورٹ میں بتایا گیا ہے کہ سال رفتہ میں مقبوضہ مغربی کنارے اور بیت المقدس میں یہودی توسیع پسندی کی سرگرمیوں میں 40 فی صد اضافہ ہوا ہے۔
رپورٹ میں بتایا گیا ہے کہ پچھلے دس سال کے دوران ایک ہی سال میں یہودی توسیع پسندی کا یہ پہلا واقعہ ہے۔ رپورٹ میں کہا گیا ہے کہ اسرائیلی حکومت فلسطین میں یہودی توسیع پسندی کو کئی گنا بڑھانے کے اپنے دعوے پرقائم ہے۔ سنہ 2009 ء کی نسبت 2013 ء میں بڑی تعداد میں مکانات تعمیر کیے گئے جبکہ پچھلے سال پچھلے تمام ریکارڈ توڑ دیے گئے ہیں۔
رپورٹ کے مطابق سنہ 2014 ء کےدوران مجموعی طورپر 4485 مکانات کی منظوری دی گئی۔ سنہ 2013 ء میں تعمیر کردہ مکانات کی تعداد 3710 تھی جبکہ سنہ 2007 ء میں یہ تعداد 858 تھی۔
بشکریہ:مرکزاطلاعات فلسطین