قابض اسرائیلی فوج نے گزشتہ روز الخلیل کے علاقے بیت امر پر چڑھائی کی۔ چڑھائی کے دوران اسرائیلی فوج کے ساتھ جھڑپوں میں آٹھ فلسطینی زخمی اور دو کو گرفتار کیا گیا، جبکہ اسرائیلی فوج نے اپنے ایک فوجی کے زخمی ہونے کا بھی انکشاف کیا۔
نسلی دیوار اور یہودی آبادکاری کے خلاف پاپولر کمیٹی کے ترجمان محمد عواد نے قدس پریس کو بتایا کہ قابض اسرائیلی فوج نے رات دو بجے بیت امر پر دھاوا بولا۔ بعد ازاں علاقے کے رہائشیوں اور قابض فوج کے درمیان جھڑپوں کا سلسلہ شروع ہوا۔
اسرائیلی فوج نے رہائشیوں کے خلاف ربڑ کی گولیوں اور صوتی بموں کے ساتھ ساتھ آنسو گیس کو بے دریغ استعمال کیا، جس کے نتیجے میں 8 فلسطینی زخمی ہوئے۔ بعد ازاں اسرائیلی فوج نے گاوں کے گھروں کی تلاشی لی۔
اسرائیلی فوج نے گھروں کی تلاشی کے دوران 2 فلسطینی نوجوان 16 سالہ رفعات مصطفی عواد اور 15 سالہ رمزی نصیر الامی کو تشدد کا نشانہ بناتے ہوئے گرفتار کیا۔
فلسطینیوں نے ان تمام واقعات کے ردعمل میں اسرائیلی فوج پر پتھروں اور خالی بوتلوں کی بارش کی جس کے نتیجے میں ایک اسرائیلی فوجی کو معمولی سے زخم آئے۔
بشکریہ:مرکزاطلاعات فلسطین