فلسطین کے مقبوضہ مغربی کنارے میں اسرائیلی فوج نے مختلف شہروں میں گھرگھر تلاشی کی کارروائیوں میں کم سے کم ایک درجن فلسطینی گرفتار کر لیے ہیں۔ تازہ گرفتاریاں مغربی کنارے کے شہروں جنین، بیت لحم، القدس اور الخلیل میں کی گئی ہیں۔
مرکز اطلاعات فلسطین کے مطابق مقبوضہ مغربی کنارے کے جنوب مغربی شہر بیت لحم میں تلاشی کی کارروائیوں کےدوران دو سگے بھائیوں سمیت کم سے کم پانچ فلسطینیوں کو حراست میں لیا گیا ہے۔
مغربی کنارے کے جنوب میں الخلیل شہر کے صوریف قصبے سے چار فلسطینیوں کو گرفتار کیا گیا۔ الخلیل شہر میں گھر گھر تلاشی کی کارروائیوں میں تفتیشی کتوں کے ذریعے بھی تلاشی لی گئی۔ شہریوں بالخصوص بچوں اور خواتین کو بھی زد و کوب کیا جاتا رہا ۔
مقبوضہ بیت المقدس سے عینی شاہدین کے مطابق شہر کے مغرب میں بیت اکسا کے مقام سے یہودی فوجیوں نے گھرگھر تلاشی کی کارروائیوں کے دوران ایک شہری کو گرفتار کیا جبکہ دو افراد کو جنین سے حراست میں لے کر نامعلوم مقام کی جانب منتقل کر دیا گیا ہے۔
عینی شاہدین کا کہنا ہے کہ مقبوضہ بیت المقدس میں بیت اکسا کے مقام پر اسرائیلی فوج گذشتہ تین روز سے مسلسل کریک ڈاؤن کر رہی ہے۔ شہریوں کو بغیر کسی الزام کےحراست میں لیا جا رہا ہے اور خواتین اور بچوں کو ہراساں کیا جاتا ہے۔
مغربی کنارے کے شہر طولکرم سے بھی فلسطینی آبادیوں میں اسرائیلی فوج کے سرچ آپریشن کی اطلاعات ہیں تاہم کسی شخص کی گرفتاری کی اطلاعات سامنے نہیں آ سکیں۔ تلاشی کی کارروائیوں میں قابض صہیونی فوجیوں نے شہریوں کے زیراستعمال ان کے ذاتی کمپیوٹرز بھی قبضے میں لے لیے ہیں۔