فلسطین میں اسرائیلی فوج کی ریاستی دہشت گردی اور فلسطینیوں کےخلاف جارحیت کا سلسلہ جاری ہے۔ منگل کے روز مغربی کنارے کے مختلف علاقوں میں تلاشی اور چھاپوں کی مختلف کارروائیوں میں کم سے کم دس فلسطینیوں کو حراست میں لے لیا گیا ہے۔
یہ گرفتاریاں فلسطینی تنظیم حماس کے ساتھ اسیران کے تبادلے کی ایک بڑی ڈیل کے تحت پانچ سو پچاس فلسطینیوں کی رہائی کے ایک روز بعد ہوئی ہیں۔
مرکزاطلاعات فلسطین کے مطابق منگل کے روز صہیونی فوج نے مختلف شہروں، قصبوں اور مہاجرکیمپوں میں تلاشی کا سلسلہ جاری رکھا۔ تلاشی کی کارروائیوں کے دوران فلسطینی شہریوں خواتین اور بچوں کو گھروں سے باہر نکال کرگھروں کی جامہ تلاشی لی گئی ہے۔ تلاشی کے دوران گھروں میں موجود قیمتی چیزوں کی توڑپھوڑ کے ساتھ ساتھ کئی قیمتی چیزیں چوری بھی کر لی گئیں۔
اسرائیلی ریڈیو رپورٹ میں بتایا گیا ہے کہ حراست میں لیے جانے والے تمام افراد کا تعلق انٹیلی جنس کو مطلوب گروہوں سے تھا اور سیکیورٹی حکام کئی روز سے ان کی تلاش کے لیے چھاپے مار رہے تھے۔
عینی شاہدین کے مطابق سات فلسطینیوں کو مغربی کنارے کے شمالی شہر جنین سے حراست میں لیا گیا جب کہ تین دیگر شہروں کو فلسطینی اتھارٹی کے زیرانتظام دیگر مختلف شہروں سے حراست میں لیا گیا ہے۔