(روز نامہ قدس ۔آنلائن خبر رساں ادارہ ) ڈاکٹر صابر ابو مریم نےحکومت پاکستان سے مطالبہ کیا کہ کشمیر کی آزادی کی جدوجہدکرنے والے کشمیری مجاہدین کی بھرپور حمایت کی جائے۔
آل پارٹیز حریت کانفرنس کشمیر کی جانب سے گذشتہ روز اسلام آباد کےمرکزی آفس میں رہنماؤں کا ایک اہم اجلاس منعقد ہوا جس میں فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم نےعلی چاہدری کے ہمراہ خصوصی شرکت کی۔
فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم نے آل پارٹیز حریت کانفرنس کی جماعتوں کے نمائندہ اجلاس سے خطاب کرتے ہوئے کہا کہ شہدائے کشمیر کی قربانیاں رائیگاں نہیں جائیںگی اور کشمیری عوام کو ان کے حقوق حاصل ہو کر رہیں گے۔
کشمیری رہنماؤں کے مشترکہ اجلاس سے خطاب کرتے ہوئے ڈاکٹر صابر ابو مریم نے کہا کہ بھارت کی ریاستی دہشت گردی روز بروز بڑھتی جا رہی ہے جبکہ کشمیر کے عوام نے بے پناہ قربانیاں دے کر تحریک آزادی کو زندہ رکھا ہو اہے۔
انہوں نے کہا کہ عالمی برادری کی مجرمانہ خاموشی پر افسوس ہے تاہم کشمیری عوام کی جدوجہد ضرور کامیا ب ہوگی اور کشمیر جلد بھارت کے چنگل سے آزاد ہو گا۔
انہوں نے حکومت پاکستان سے مطالبہ کیا کہ کشمیر کی آزادی کی جدوجہدکرنے والے کشمیری مجاہدین کی بھرپور حمایت کی جائے۔