(روز نامہ قدس ۔آنلائن خبر رساں ادارہ ) مقبوضہ فلسطین میں صیہونی ریاستی دہشتگردی اور غزہ پر وحشیانہ بمباری کے خلاف پاکستان کے تمام چھوٹے بڑے شہروں میں احتجاجی مظاہرے ، جلسے ، جلوس اور ریلیاں نکالی گئیں۔
آج جمعہ کے روز پاکستان بھر میں مقبوضہ فلسطین پر قابض صیہونی ریاست کی ریاستی دہشتگردی کے خلاف یوم یکجہتی فلسطین منایا گیا، اس موقع پر دارلحکومت اسلام آباد، لاہور، کراچی،پشاور،کوئٹہ،ملتان،اندرون سندھ آزادکشمیر اور گلگت بلتستان کے مختلف اضلاع سمیت ملک کے دیگر چھوٹے بڑے شہروں میں فلسطین کی شہری آبادیوں پر صیہونی بمباری کے خلاف احتجاجی مظاہرے کیے گئے۔
جلسے جلوس اور احتجاجی ریلیوں میں پاکستان کی تمام سیاسی ومذہبی جماعتوں کے رہنماؤں سمیت سماجی ، حقوق کی تنظیموں کے نمائندگان، سول سوسائٹی کے اراکین اور مختلف مکاتب فکر سے تعلق رکھنے والی شخصیات نے شرکت کی۔
مظاہرین نے پلے کارڈز اور بینرز اٹھا رکھے تھے جن پر اسرائیلی مظالم اور مغربی استعمار کے خلاف نعرے درج تھے۔
مقررین کا کہنا تھا کہ صیہونی ریاست اسرائیل کی طرف سے جنگ بندی کا اعلان فلسطینی عوام کی فتح اور استعماری طاقتوں کی پسپائی کی نوید ہے۔ فلسطینیوں کی استقامت و جرات کے سامنے اسرائیل کے حوصلے ماند پڑ گئے ہیں۔