(روز نامہ قدس ۔آنلائن خبر رساں ادارہ ) کشمیری نوجوانوں کی شہادت کے بعد عوام کی بڑی تعداد گھروں سے باہر نکل آئی اور شدید احتجاج کیاجبکہ مظاہرین کو منتشر کر نے کے لیے بھارتی فوج نے بدترین لاٹھی چارج کیا اورآنسو گیس شیلنگ سمیت پیلٹ گن فائر کیے۔
تفصیلات کے مطابق گذشتہ روز بھارتی قابض فوج کی بڑھتی ہوئی جارحیت کا نشانہ بننے والے مقبوضہ کشمیر کے پانچ بے گناہ کشمیری نوجوانوں کو بھارتی فوج نے ضلع پلوامہ کے علاقے راجپور میں نام نہاد سرچ آپریشن کے دوران اندھا دھند فائرنگ کرکے شہید کر دیا۔
ذرائع کے مطابق نوجوانوں کی شہادت کے بعد کشمیری عوام کی بڑی تعداد گھروں سے باہر نکل آئی اور نوجوانوں کی شہادت کے خلاف شدید احتجاج کیا، احتجاجی مظاہرین کو منتشر کر نے کے لیے بھارتی فوج نے بدترین لاٹھی چارج کیا جس کے نتیجے میں متعدد افراد زخمی ہوگئے جبکہ آنسو گیس سمیت پیلٹ گن کا استعمال کیاجس کے باعث بھارتی فوج اور مظاہرین کے درمیان جھڑپیں شروع ہوگئیں اور قابض فوجی اہلکاروں نے کئی افراد کو حراست میں لے لیا۔
اب تک کی اطلاعات کے مطابق مقبوضہ کشمیر میں گذشتہ ماہ سے اب تک بھارتی فوج کے نام نہاد سرچ آپریشن کے دوران 17 کشمیری نوجوان شہید ہو چکے ہیں جبکہ علاقے میں اب بھی سرچ آپریشن جاری ہے۔