(روز نامہ قدس ۔آنلائن خبر رساں ادارہ ) صہیونی فوج کےمسجد اقصیٰ پر حملے کی خبر سے دنیا بھر کے مسلمانوں میں شدید اشتعال پھیل گیاہے اور پاکستان سمیت دنیا بھر میں مسلمانوں کی طرف سے اس حملے کی مذمت جا ری ہے۔
غیر ملکی ذرائع ابلاغ کے مطابق مقبوضہ فلسطین میں گذشتہ روز مسجد اقصٰی میں فلسطینی نمازیوں پر ہونے والے صہیونی فوجی حملے کی مذمت کرتے ہوئے ترک وزیرخارجہ میولوت چاوش اولو نےکہا ہے کہ رمضان المبارک کے دوران معصوم نمازیوں پر حملہ کرنا غیرانسانی فعل ہے، اسرائیلی قبضہ ختم ہونا چاہیے، ہمیشہ فلسطینیوں کے انصاف کے مطالبے کے ساتھ کھڑے ہوں گے۔
اس حوالے سے ترکی کے شہر استنبول میں سینکڑوں ترک شہری اسرائیلی قونصلیٹ کے باہر جمع ہو ئے اورانہوں نے مسجد اقصی کی بےحرمتی اور نمازیوں پر حملے کے خلاف احتجاجی مظاہرہ کرتے ہوئے صہیونی غاصب ریاست کے خلاف شدید نعرے بازی کی۔
دوسری جانب امیر جماعت اسلامی پاکستان سراج الحق نے بھی مسجد اقصیٰ پر اسرائیلی حملے کی شدید مذمت کرتے ہوئے کہا ہے کہ قبلہ اول مسجد اقصی میں نمازیوں پر قابض اسرائیلی فوج کا حملہ قابل مذمت ہے، عبادت مسلمانوں کا دینی وقانونی حق ہے جسےکوئی قابض ریاست نہیں چھین سکتی، پاکستانی قوم اس ظلم و ناانصافی کےخلاف اپنے فلسطینی بھائیوں کےشانہ بشانہ کھڑی ہےاور ان کی جرات و بہادری اور مزاحمت کو سلام پیش کرتی ہے۔
واضح رہے کہ صہیونی فوج کےمسجد اقصیٰ پر حملے کی خبر سے دنیا بھر کے مسلمانوں میں شدید اشتعال پھیل گیا ہے اور پاکستان سمیت دنیا بھر میں مسلمانوں کی طرف سے اس حملے کی مذمت کی جا رہی ہے