(روز نامہ قدس ۔آنلائن خبر رساں ادارہ ) قابض بھارتی سیکیورٹی فورسز نے پولیس اسٹیشن میں پوچھ گچھ کے دوران نوجوان کو گولی مارکر شہید کیا جبکہ اس سے قبل شہید نوجوان کے ایک اور بھائی کو نام نہاد سرچ آپریشن کے دوران بھارتی فوج نے فائرنگ سے شہید کیا تھا۔
تفصیلات کے مطابق ضلع پلواما کے ترال پولیس اسٹیشن میں بھارتی نیم فوجی اور خصوصی آپریشن گروپ کی جانب سے حراست میں لیے گئے کشمیری نوجوان پر بدترین تشدد کیا گیا جس کے نتیجے میں محمد امین ملک نامی کشمیری نوجوان کی حالت غیر ہوگئی جس کے بعد بھارتی فورسز کے اہلکاروں نےکھلم کھلا جارحیت کا مظاہرہ کیا اور تشدد کا شکار ہونے والے محمد امین ملک پر گولی چلادی جس کے نتیجے میں نوجوان کی شہادت ہوئی۔
واضح رہے کہ شہید ہونے والے نوجوان کو چند روز قبل ہی قابض بھارتی پولیس کی حراست میں لیا گیا تھا جبکہ نوجوان محمد امین ملک کےایک بھائی پہلے ہی نام نہاد سرچ آپریشن کے دوران بھارتی فوج کی فائرنگ سے شہید کیے جاچکےہیں۔