(روز نامہ قدس ۔آنلائن خبر رساں ادارہ) کراچی پریس کلب کی جوائنٹ ایکشن کمیٹی میں شامل پاکستان کی تمام بڑی صحافتی تنظیموں نے پاکستانی صحافیوں کے حالیہ غیر قانونی صیہونی ریاست اسرائیل کے دورے کی سخت الفاظ میں مذمت کرتے ہوئے اسے اسرائیلی جنگی جرائم پر پردہ ڈالنے کی کوشش قرار دیا ہے۔
صدر کراچی پریس کلب، فاضل جمیلی کی قیادت میں قائم جوائنٹ ایکشن کمیٹی نے اس دورے پر اپنے شدید غم و غصے کا اظہار کرتے ہوئے مشترکہ بیان میں کہا کہ یہ دورہ فلسطینیوں کے خلاف غیر قانونی صیہونی ریاست اسرائیل کی جاری وحشیانہ جارحیت کے دوران کیا گیا۔ غیر قانونی صیہونی فورسز 150 سے زائد صحافیوں کو سچ کو بے نقاب کرنے پر شہید کر چکی ہیں۔
کمیٹی نے کہا کہ اس دورے میں حصہ لینے والے صحافی پاکستان کی صحافتی کمیونٹی کی نمائندگی نہیں کرتے اور یہ صرف ان کا انفرادی فعل تھا۔ صدر کراچی پریس کلب فاضل جمیلی نے مزید کہا کہ ہم فلسطینی کاز کے لیے اپنی غیر متزلزل حمایت کا اعادہ کرتے ہیں اور نسلی تصفیہ میں ملوث غیر قانونی صیہونی حکومت کے ساتھ حالات کو معمول پر لانے کی کسی بھی کوشش کی مذمت کرتے ہیں۔
انہوں نے یہ بھی کہا کہ پاکستانی صحافی ہمیشہ مظلوم لوگوں کے دکھ کو اجاگر کرنے میں پیش پیش رہے ہیں اور ہم اس مقصد کے لیے کسی بھی ٹھوس اقدام سے باز نہیں آئیں گے۔
سیکرٹری کراچی پریس کلب سہیل افضل خان نے مطالبہ کیا کہ تحقیقات کی جائیں کہ یہ افراد کس طرح غیر قانونی صیہونی ریاست اسرائیل کا دورہ کرنے میں کامیاب ہوئے، جبکہ پاکستانی شہریوں کے اسرائیل کے سفر پر پابندی عائد ہے۔ یہ دورہ پاکستانی قانون اور خارجہ پالیسی کے موقف کی کھلم کھلا خلاف ورزی ہے، اس کی مکمل جانچ پڑتال کی جائے اور ذمہ داروں کا احتساب کیا جائے۔
جوائنٹ ایکشن کمیٹی نے پاکستان کی تمام میڈیا تنظیموں سے مطالبہ کیا کہ وہ اپنے انصاف اور انسانی حقوق کے اصولوں پر قائم رہیں اور غیر قانونی صیہونی ریاست اسرائیل کے مظالم کو معمول پر لانے والے کسی بھی اقدام کی مذمت کریں۔