(روز نامہ قدس ۔آنلائن خبر رساں ادارہ ) ملاقات کے دوران رہنماؤں نے خطے میں بدلتی ہوئی صورتحال اور اس کے تناظر میں کشمیر و افغانستان کے مسائل پر بھی تفصیلی گفتگو کی جبکہ عالمی طاقتوں کے حوالے سےکہا کہ یہ طاقتیں فلسطین و کشمیر کاز کو فراموش کرنا چاہتی ہیں۔
ذرائع کے مطابق پاکستان عوامی تحریک کےمرکزی نائب ناظم اعلی خرم نواز گنڈا پور نےمرکز منہاج القرآن لاہور میں فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم سے ملاقات کی جس کےدوران انہوں نے عالمی طاقتوں کے حوالے سےکہا کہ عالمی طاقتیںفلسطین و کشمیر کاز کو فراموش کرنا چاہتی ہیں۔
اس ملاقات میں عثمان محی الدین، نوراللہ صدیقی اوراورنگزیب بھی فلسطین فاؤنڈیشن پاکستان کے پلیٹ فارم سے وہاں موجود تھے۔
خرم نواز گنڈا پور نے فلسطین فاؤنڈیشن پاکستان کی مسلسل جدوجہد کو سراہتے ہوئے قدردانی کی اورمستقبل میں پاکستان عوامی تحریک کی جانب سے تعاون جاری رکھنے کی یقین دہانی کراتے ہوئے کہا کہ مسئلہ فلسطین وکشمیر امت مسلمہ کے اہم مسائل ہیں اور پاکستان عوامی تحریک فلسطین کی تحریک آزادی کی حمایت کرتی ہے۔
اس موقع پر دونوں رہنماؤں نے خطے میں بدلتی ہوئی صورتحال اور اس کے تناظر میں کشمیر و افغانستان کے مسائل پر بھی تفصیلی گفتگو کی۔ جبکہ فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم نے آل پارٹیز حریت کانفرنس کے رہنماؤں کو مسئلہ فلسطین کی تازہ ترین صورتحال سے آگاہ کیا اور گیارہ روزہ لڑائی میں فلسطینی مزاحمت اور عوام کی جانب سے غاصب صہیونی ریاست اسرائیل کو پہنچائے جانے والے بھاری نقصان سے بھی آگاہ کیا۔ دونوں رہنماؤں نے اس بات پر اتفاق کیا کہ پاکستان میں مسئلہ فلسطین اور مسئلہ کشمیر کی حمایت اور آگاہی مہم کو تیز کیا جائے گا۔