مسجد الاقصیٰ کے تقدس کی پامالی ناقابل برداشت ہے، پاکستان

(روزنامہ قدس ـ آنلائن خبر رساں ادارہ) صہیونی ریاست کی جانب سے معصوم اور نہتے فلسطینیوں کی جاری نسل کشی پر پاکستان نے گہری تشویش کا اظہار کیا ہے۔ترجمان دفتر خارجہ کی جانب سے جاری کردہ بیان میں کہا گیا ہے کہ پاکستان مسجداقصیٰ پر قابض ریاست کی پشت پناہی میں صہیونی آبادکاروں کے کیے گیے حملے کی شدید ترین الفاظ میں مذمت کرتا ہے۔مسجد الاقصیٰ کے تقدس کی پامالی کسی صورت قبول نہیں کی جاسکتی۔

ترجمان شفقت علی خان نے مزید کہا کہ صہیونی ریاست کے اقدامات عالمی قوانین کی کھلی خلاف ورزی ہیں قابض صہیونی افواج  نے چوبیس گھنٹے میں سو فلسطینی شہید کر دیے، خوراک کے حصول کے منتظر شہریوں کو بھی نشانہ بنایا گیا۔

انہوں نے کہا کہ عالمی برادری قابض صہیونی ریاست کےخلاف فوری اقدامات کرے، پاکستان غزہ میں انسانی امداد کی بلا تعطل فراہمی کا مطالبہ کرتا ہے اور مظلوم فلسطینی عوام سے غیر متزلزل یکجہتی کا اظہار کرتا ہے۔

آخر میں دفترخارجہ کے ترجمان کا کہنا تھا کہ فلسطینی ریاست 1967ءکی پیشگی سرحدوں پر قائم کی جائے اور القدس الشریف کو فلسطینی ریاست کا دارالحکومت بنایا جائے۔