(روزنامہ قدس ـ آنلائن خبر رساں ادارہ) پاکستان نے ناجائز ریاست اسرائیل کی جانب سے گلوبل صمود فلوٹیلا روکنے کی شدید مذمت کی ہے۔ ترجمان دفتر خارجہ کی جانب سے جاری کیے گئے اعلامیے کے مطابق فلوٹیلا میں چالیس سے زائد کشتیوں پر پانچ سو بین الاقوامی کارکنان محصور غزہ کے عوام کے لیے امداد لے جا رہے تھے۔
اعلامیے میں کہا گیا ہے کہ قابض اسرائیل کا انسانی ہمدردی کے کارکنان کو حراست میں لینا عالمی قوانین کی سنگین خلاف ورزی ہے یہ اقدام نہتے شہریوں کی زندگیاں خطرے میں ڈالنے کے مترادف ہے۔
ترجمان دفتر خارجہ نے کہا کہ غزہ پر غیرقانونی محاصرہ دو ملین سے زائد فلسطینیوں کو اذیت اور محرومی میں مبتلا کیے ہوئے ہے امدادی سامان کی راہ میں رکاوٹ چوتھے جنیوا کنونشن کی سنگین خلاف ورزی ہے۔
اعلامیے میں کہا گیا کہ پاکستان نے فوری اور مستقل جنگ بندی کا مطالبہ دہرایا ہے پاکستان نے غزہ کا غیرقانونی محاصرہ ختم کرنے اور انسانی امداد کی آزادانہ ترسیل پر زور دیااور فلوٹیلا میں سوار تمام کارکنان کی فوری رہائی کا مطالبہ کیا ہے۔
