(روزنامہ قدس ۔آن لائن خبر رساں ادارہ) سرینگرمیں احتجاج ،بھارتی فورسزکامظاہرین کو منتشر کرنے کیلئے پیلٹ گن کااستعمال،کئی زخمی ،شہید خاتون کی تدفین 3شہدا ء کی لاشیں نہ مل سکیں،بھارتی فوج کاشوپیاں کے جعلی مقابلے میں3معصوم کشمیری شہید کرنے کااعتراف۔
گزشتہ روز مقبوضہ کشمیرمیں خاتون سمیت 5 کشمیری مسلمانوں کی شہادت پر نماز جمعہ کے بعد شدیداحتجاج کیا گیا اور وادی میں مکمل ہڑتال کی گئی ۔
حریت قیادت نے سری نگر میں محاصرے اور تلاشی آپریشن کے دوران بیگناہ کشمیریوں کے قتل کو گھناؤنی کارروائی قرار دیتے ہوئے ان کی بین الاقوامی انویسٹی گیشن ایجنسی سے تحقیقات کا مطالبہ کردیا۔
گزشتہ روز سرینگر میں سینکڑوں شہری بھارتی فورسز کیخلاف نعرے لگاتے ہوئے گھروں سے نکل آئے ، مظاہرین کو منتشر کرنے کیلئے قابض فورسز نے آنسو گیس اور پیلٹ گن کااستعمال کیا جس سے کئی افراد زخمی ہوگئے ۔ مشتعل مظاہرین نے بھارتی فورسز پر پتھراؤ کیا، مظاہرین ‘پاکستان زندہ باد’ اور‘ ہم آزادی چاہتے ہیں’ جیسے نعرے لگا تے رہے۔
ایک روز قبل بھارتی فورسز کی فائرنگ سے جام شہادت نوش کرنیوالی 45سالہ خاتون کو سری نگر میں سپردخاک کر دیا گیا جبکہ اسی کارروائی میں شہید ہونیوالے 3نوجوانوں ذاکر احمد پال،عبیر مشتاق بٹ اور عادل حسین بٹ کی لاشیں بھارتی فورسز نے لواحقین کے حوالے کرنے سے انکار کردیا ۔