کراچی میں یوم القدس کے موقع پر قبلہ اول کی آزادی اور فلسطینیوں سے اظہار یک جہتی کے لیے القدس ریلی بعد نماز جمعہ کیپری سنیما سے تبت سینٹر تک نکالی گئی ۔
ملک بھر کی طرح کراچی میں بھی ناجائز ریاست اسرائیل کے قیام کے خلاف اور فلسطینیوں سے اظہاریکجہتی کے لئے القدس ریلی نکالی گئی جس میں سیاسی مذہبی جماعتوں کےکارکنان کے ساتھ مختلف مکتبہ فکرکے علماء نے شرکت کی۔
ریلی کے شرکا نے ہاتھوں میں پرچم، پلے کارڈز اور بینرز اٹھا رکھے تھے۔ جن پر اسرائیلی جارحیت اور مظلوم فلسطینی بھائیوں کے حق اور بیت المقدس کی آزادی کے نعرے درج تھے۔
یوم القدس کے موقع پرسیکیورٹی کے انتہائی سخت ترین اقدامات کئے گئے تھے ریلی کی گزرگاہوں اور اطراف میں پولیس ،رینجرز اور پولیس کے کمانڈوس تعینات کئے گئے تھے جبکہ ٹریفک کے بہاوکو برقراررکھنے کے لئے ٹریفک پولیس کے ساتھ سیکڑون کی تعداد میں والنٹیرز نے بھی خدمات انجام دیں ۔
سیکیورٹی کے حوالے سے آئی جی سندھ کلیم امام نے کہا کہ نمازجمعہ کا آغاز تا اختتام اور یوم القدس کی مناسبت سے ریلیوں اور اجتماعات پرامن وامان کےحالات کے حوالے سے لمحہ بہ لمحہ باخبر رکھا گیا جبکہ جمعتہ الوداع اور یوم القدس کے موقع پر مرکزی مساجد، امام بارگاہوں اور دیگر مقامات پر سیکیورٹی کے فول پروف اقدامات کو یقینی بنایا گیا ۔