اسلام آبا د (روز نامہ قدس ۔آن لائن خبر رساں ادارہ)فلسطین فائونڈیشن پاکستان اور پارلیمنٹری فورم برائے فلسطین کے اشتراک سے اسلام آباد میں سینیٹر مشاہد حسین کی زیر صدارت القدس کا نفرنس کا انعقاد جمعرات کے روز پارلیمنٹری سروس آڈیٹوریم میں کیا گیا۔ القدس کانفرنس سے خطاب کرتے ہوئے پاکستان عوامی نیشنل پارٹی کے سینئر رہنما سینیٹر افراسیاب خٹک نے کہا کہ فلسطینیوں کے ساتھ بد ترین ناانصافی کی گئی ۔عرب دنیا اپنی پالیسی پر نظر ثانی کرے۔ برطانوی استعمار نے فلسطین میں صہیونیوں کی جعلی ریاست قائم کر کے دنیا کے امن کو داؤ پر لگایا۔ ان کا کہنا تھا کہ امریکہ کا ایران پر حملہ پورے خطے کو آگ کی لپیٹ میں لے سکتا ہے۔ انہوں نے ایران کو دی جانے والی امریکی دھمکیوں کی شدید الفاظ میں مذمت کرتے ہوئے کہا کہ کسی کو یہ حق حاصل نہیں کہ ریاستوں کے اندرونی معاملات میں دخل اندازی کرے اور حملوں کی دھمکیاں دے۔ ان کاکہنا تھا کہ پاکستان کی پالیسی کا محور و مرکز مظلومین جہاں کی حمایت ہونی چاہیئے۔ کشمیر،فلسطین کے معاملات کو گہرائی سے دیکھنا ہوگا، عرب لیگ کا کردار بہت حیران کن اور عجوبہ کے ماند ہے۔ عرب لیگ میں اپنے ممبران کو بھی آزادی سے بات کرنے کا حق حاصل نہیں عرب لیگ نے شام کی رکنیت تک معطل کر رکھی ہے عرب حکمران اور ان کے بادشاہ مغرب کی غلامی میں اپنی اقدار اور اسلامی راویات کو پس پشت ڈال چکے ہیں دنیا کے بدلتے حالات اس بات کا متقاضی ہیں ہم اپنی پالیسی پر نظر ثانی کریں۔ان کاکہنا تھا کہ فلسطین کی مظلومیت اور غاصب صہیونی ریاست کے سیاہ چہرے سے نقاب اتارنے میں پاکستان اور ایران کو مرکزی کردار ادا کرنا ہو گا۔ القدس کانفرنس میں فلسطینی سفیر ابو ایمن، سینیٹر مشاہد حسین ، سینیٹر فرحت اللہ بابر، چیئر مین کشمیر کمیٹی سید فخر امام، سینیٹر جنرل (ر) عبد القیوم، عابدہ حسین، اور فلسطین فاؤنڈیشن پاکستان کے مرکزی سیکرٹری جنرل صابر ابو مریم سمیت نادر کمال، شیخ تجمل ، عارف کمال، حمید لون و دیگر نے شرکت کی
فلسطینیوں کی ساتھ دنیا کی سب سے بڑی ناانصافی ہوئی۔ عرب دنیا اپنی پالیسی پر نظر ثانی کرے۔ سینیٹر افراسیاب خٹک
