(روز نامہ قدس ۔آنلائن خبر رساں ادارہ ) قابض بھارتی افواج مقبوضہ کشیمرمیں انسانی حقوق کی سنگین خلاف ورزیوں کی مرتکب ہورہی ہے جس کے سبب مقبوضہ وادی کی صورتحال انتہائی تشویشناک ہوگئی ہے۔
ملتان اپنی رہائش گاہ پر پریس کانفرنس سے خطاب کرتےہوئے تحریک انصاف کے وائس چیئرمین اور وزیرخارجہ شاہ محمود قریشی نے مقبوضہ کشمیر میں بھارتی سیکیورٹی فورسز کی جانب سے انسانی حقوق کی بدترین خلاف ورزیوں پر تشویش کا اظہا رکرتےہوئے عالمی برادری سے مطالبہ کیا ہے کہ وہ بھارت کے غیرقانونی زیرقبضہ جموں و کشمیر میں بھارتی مظالم کا نوٹس لے، مقبوضہ کشمیر کا خصوصی درجہ ختم کرنے کے بھارت کے غیرقانونی اقدام کے باعث خطے کی صورتحال پیچیدہ اور غیریقینی ہو گئی ہے۔
انھوں نے کہا کہ جب تک مسئلہ کشمیر، کشمیریوں کی منشاء کے مطابق حل نہیں کیا جاسکتا اس وقت تک خطے میں امن اور استحکام ممکن نہیں ہے، پاکستان نے مسئلہ کشمیر کو ہربین الاقوامی فورم پر اٹھایا ہے اور وہ اس تنازعے کو مذاکرات کے ذریعے حل کرنا چاہتا ہے، پاکستان اور بھارت دونوں فریقین کے پاس خطے میں امن و استحکام کے قیام کا واحد راستہ مذاکرات ہیں کیونکہ دونوں ملک ایٹمی قوت ہیں اور وہ جنگ کے متحمل نہیں ہو سکتے۔
انہوں نے کہا کہ اگر بھارت پاکستان کے ساتھ تعلقات معمول پر لانا چاہتا ہے تو اسے اس کیلئے سازگار ماحول قائم کرنا ہوگا۔