(روز نامہ قدس ۔آنلائن خبر کو رساں ادارہ) فلسطین فاؤنڈیشن پاکستان (بلوچستان چیپٹر) کےزیر اہتمام ماہ رمضان المبارک ماہ فلسطین مہم کے تحت کوئٹہ پریس کلب میں یکجہتی فلسطین کانفرنس کا انعقاد کیا گیا۔ کانفرس میں مختلف مسالک کے علمائے کرام سمیت سیاسی جماعتوں کے رہنما اور مختلف طبقات سے تعلق رکھنے والے با اثر اور سرکردہ خواتین و حضرات سمیت طلباء و طالبات نے شرکت کی۔
یکجہتی فلسطین کانفرنس سے نیشنل پارٹی کے مرکزی ترجمان علی احمد لانگو، جماعت اسلامی بلوچستان کے صوبائی رہنما ڈاکٹر عطاء الرحمن، مجلس وحدت مسلمین کے رہنما علامہ مقصود علی ڈومکی، بلوچستان نیشنل پارٹی رہنماواحد بلوچ،علامہ سید ظفر عباس شمسی علامہ سہیل اکبر شیرازی،جمعیت اتحاد العلماء بلوچستان کے صوبائی صدر مولانا عبدالکبیر شاکر، پشتون خواہ ملی عوامی پارٹی کےرہنما کبیر افغان ،سابق سینٹر میر مہیم خان بلوچ، پاکستان تحریک انصاف کے رہنما ایڈوکیٹ خورشید کاکڑ ،عالم خان کاکڑ جمعیت اھل حدیث کے رہنما مولانا سید عتیق الرحمن، مرکزی مسلم لیگ کے صوبائی رہنما محمد ادریس مغل، جمعیت علماء اسلام کے رہنما مفتی سنزر سعید ،مرکزی جامع مسجد کے نائب خطیب مفتی احسان الحق حقانی، الخدمت فاؤنڈیشن بلوچستان کے صوبائی صدر انجینئر جمیل احمد کرد اور علامہ شیخ ولایت حسین جعفری نے خطاب کیا۔
کانفرنس سے خطاب کرتے ہوئے مقررین نے کہا کہ گذشتہ چند سالوں میں امریکہ اور اسرائیل نے غزہ اور فلسطین میں ظلم و بربریت کی ایک نئی تاریخ رقم کی ہے۔ آج پوری دنیا اسرائیل کا سفاک چہرہ دیکھ چکی ہے۔حقوق انسانی اور حقوق اطفال و نسواں کے جھوٹے دعوے داروں نے جس طرح غزہ میں معصوم انسانوںکا قتل عام کیا اس نے امریکہ اور اسرائیل کا مکروہ چہرہ پوری دنیا کے سامنے عیاں کر دیا ہے۔
انہوں نے کہا کہ بلوچستان کے عوام کو یہ اعزاز حاصل ہے کہ انہوں نے قبلہ اول کی آزادی کے لیے خون کا نذرانہ دیاہے ۔ مقررین کاکہنا تھا کہ ہم اس موقع پر شہدائے یوم القدس کوئٹہ کو سلام عقیدت پیش کرتے ہیں ۔مقررین نے حکومت سے مطالبہ کیا کہ جمعۃ الوداع کو ملک بھر میں یوم القدس منانے کاسرکاری اعلان کیا جائے ۔
یکجہتی فلسطین کانفرنس سے خطاب کرتے ہوئےمقررین کاکہنا تھا کہ پاکستان کے عوام نے ہمیشہ فلسطینیوں کا ساتھ دیا ہے او ر اب ماہ رمضان المبارک کے ہماری ذمہ داری ہے کہ امریکی و اسرائیلی مصنوعات کے بائیکاٹ کو جاری رکھ کر فلسطینی عوام کے دکھ درد کو کم کرنے میں مدد کریں۔
کانفرنس میں شریک تمام طبقات نے عوام سے اپیل کی کہ رمضان المبارک کے مہینہ میں سحر اور افطار کےدستر خوان کو ایسی تمام کمپنیوں کی مصنوعات سے پاک رکھا جائے جو براہ راست یا بلا واسطہ امریکہ اور اسرائیل کی مدد کر رہی ہیں اور اس مدد سے غزہ و لبنان میں معصوم انسانوں کی نسل کشی جاری ہے۔
رہنماؤں کاکہنا تھا کہ پاکستان میں جاری دہشت گردی کی لہر ہو یا پاکستان کو غیر مستحکم کرنے کی سازش ہو امریکی حکومت ہمیشہ سے پاکستان کو نقصان پہنچانے میں سر فہرست رہی ہے۔ ان کاکہنا تھا کہ امریکی حکومت غزہ میں نسل کشی کے بعد اب غزہ والوں کی سیاسی نسل کشی کرنا چاہتی ہے لیکن دنیا یہ بات جان لے کہ فلسطین پورے کا پورا فلسطینیوں کا ہے اور اسرائیل ایک غاصب اور ناجائز ریاست ہے۔
مقررین نےکہا کہ ہم پاکستانی ہیں اور بابائے قوم قائد اعظم محمد علی جناح کے نظریہ پر ایمان رکھتے ہیں اور کسی کو اجازت نہیں دی جائے گی کہ غاصب اسرائیل کے لئے نرم رویہ رکھے۔انھوں نے عوام سے اپیل کی کہ فلسطینی عوام کی مالی ، سیاسی، اخلاقی مدد جاری رکھیں۔