(فلسطین نیوز۔مرکز اطلاعات) کراچی( )فلسطین فاؤنڈیشن پاکستان کے مرکزی رہنماؤں سابق رکن قومی اسمبلی و نائب امیر جماعت اسلامی کراچی مظفر احمد ہاشمی، سربراہ جعفریہ الائنس پاکستان سینیٹر علامہ عباس کمیلی، جمعیت علمائے پاکستان کے مرکزی رہنما علامہ قاضی احمد نورانی صدیقی ، متحدہ قومی موومنٹ پاکستان کی لیگل ایڈ کمیٹی کے صدر محفوظ یار خان ایڈووکیٹ، مجلس وحدت مسلمین پاکستان کے مرکزی رہنما مولانا باقر زیدی، پاکستان مسلم لیگ نواز کے رہنما ازہر علی ہمدانی، پائیلر کے صدر کرامت علی، مسلم لیگ نواز خواتین سندھ کی صدر زاہدہ بھنڈ، ایمیٹی انٹرنیشنل کے طارق شاداب اور فلسطین فاؤنڈیشن پاکستان کے مرکزی جنرل سیکرٹری صابر ابو مریم نے اسرائیلی وزیر اعظم نیتن یاہو کی جانب سے اقوام متحدہ کے سیکرٹری جنرل بان کی مون کو دہشت گرد کہنے پر شدید غصے کا اظہار کرتے ہوئے کہا ہے کہ اسرائیل ایک غاصب اور دہشت گرد صیہونی ریاست ہے اور بان کی مون کو دہشت گرد کہنے والا اسرائیلی وزیر اعظم نیتن یاہو اور غاصب اسرائیل دہشت گرد کی اصل جڑ ہیں۔انہوں نے کہا کہ اگر مظلوم فلسطینیوں کی حمایت کرنا دہشت گردی کے زمرے میں آتا ہے تو پھراسرائیل کی دہشت گردی اورانسانیت سوز مظالم کیا ہیں؟رہنماؤں نے کہا کہ اسرائیلی وزیر اعظم کی جانب سے اقوام متحدہ کے سیکرٹری جنرل بان کی مون کو دہشت گرد کہنا درا صل اقوام عالم کو دہشت گرد کہا گیا ہے اور یہ اقوام عالم کی توہین ہے تاہم انہوں نے عالمی برادری سے مطالبہ کیا کہ مسئلہ فلسطین کے حل کے لئے سنجیدہ کوششیں کی جائیں بصورت دیگر اسرائیل پوری دنیا کو اپنی دہشت گردی کی لپیٹ میں لے لے گا ۔انہوں نے حالیہ دنوں صیہونی جیل میں قید فلسطینی صحافی القیق سے بھرپور ہمدردی اور یکجہتی کا اعلان کیا کہ جو گذشتہ دو ماہ سے اپنی بلا جواز گرفتاری کے باعث صیہونی جیل میں بھوک ہڑتال پر ہیں اور ان کی زندگی کو شدید خطرہ لا حق ہے۔
واضح رہے کہ گذشتہ دنوں اقوا م متحدہ کے سیکرٹری جنرل بان کی مون نے مقبوضہ فلسطین میں جاری اسرائیلی مظالم اور فلسطینیوں کی زمینوں پر صیہونیوں بستیوں کی تعمیرات کے عمل کو ناجائز اور قابل مذمت قرار دیا تھا جس کے بعد اسرائیلی وزیر اعظم نیتن یاہو نے بان کی مون کو دہشت گرد کہااور دہشت گردوں کا حامی قرار دیا تھا۔