جماعت اسلامی کراچی کے قائم مقام امیر برجیس احمد نے کہا کہ حکومت ان واقعات کے پیچھے ملوث عناصر کو بے نقاب کرنے کے بجائے سارا الزام طالبان کے سر تھوپ کر معاملے پر مٹی ڈالنے کی کوشش کرتی ہے جس کے نتیجے میں حقیقی دہشتگرد بے نقاب نہیں ہوتے۔
جماعت اسلامی کراچی کے قائم مقام امیر برجیس احمد نے کہا ہے کہ مسجد اقصیٰ مسلمانوں کا قبلہ اول ہے، جمعتہ الوداع کو پوری دنیا کے مسلمان یوم القدس منا کر بیت المقدس کو اسرائیل کے قبضے سے آزاد کرانے کا عزم کرتے ہیں۔ انہوں نے کہا کہ سفاری پارک کے قریب یوم القدس ریلی کے شرکاء کی بس میں بم دھماکہ ایک سوچی سمجھی سازش ہے، جس کی جتنی مذمت کی جائے کم ہے۔ انہوں نے کہا کہ حکومت کی ناقص پالیسیوں کی وجہ سے پورے ملک میں امن و امان کی صورتحال انتہائی ابتر ہے، کسی کی جان و مال، عزت و آبرو محفوظ نہیں۔ ملک کے طول و عرض میں ہونے والے پے درپے بم دھماکوں نے ملک کی داخلی سلامتی کو خطرات سے دوچار کردیا ہے اور عوام شدید عدم تحفظ کا شکار ہوگئے ہیں۔
انہوں نے کہا کہ ٹارگٹ کلنگ اور بم دھماکے معمول ہوگئے ہیں، حکومت اور قانون نافذ کرنے والے ادارے دہشتگردی پر قابو پانے میں مکمل طور پر ناکام ہیں۔ انہوں نے کہا کہ ملک دشمن عناصر پاکستان کی سالمیت اور خودمختاری کے خلاف سازش کر رہے ہیں اور کوشش کی جارہی ہے کہ کسی طرح پاکستان کو غیر مستحکم اور غیر محفوظ بنا دیا جائے۔ ادھر حکومت ان واقعات کے پیچھے ملوث عناصر کو بے نقاب کرنے کے بجائے سارا الزام طالبان کے سر تھوپ کر معاملے پر مٹی ڈالنے کی کوشش کرتی ہے جس کے نتیجے میں حقیقی دہشتگرد بے نقاب نہیں ہوتے۔ انہوں نے مطالبہ کیا کہ جاں بحق ہونے والے افراد کے اہلخانہ کو معاوضہ اور زخمیوں کا علاج سرکاری خرچ پر کرایا جائے، نیز اس واقعے کی تحقیقات کرائی جائے اور ملزمان کو قرار واقعی سزا دی جائے۔