مصری صدر محمد مرسی نے عالمی برادری اور غیر وابستہ ممالک کی تنظیم سے مسئلہ فلسطین کے ایسے حل، جس میں فلسطینی قوم کے حقوق کی مکمل پاسداری کی گئی ہو، میں کردار ادا کرنے پر زور دیا ہے۔
انہوں نے یہ بیان غیر وابستہ ممالک کی کانفرنس کے افتتاحی تقریب میں خطاب کے دوران دیا۔
مصری صدر نے زور دیا کہ مصر فلسطینی آزاد اور خودمختار ریاست کے قیام کے اپنے موقف پر ڈٹا رہے گا، ان کا کہنا تھا کہ ہم فلسطینی ریاست کےاقوام متحدہ کی مکمل رکنیت کے موقف کا ساتھ دیتے رہیںگے۔ انہوں نے کہا کہ عالمی برداری اور انسانی حقوق کےعلمبرداروں کو صہیونی عقوبت خانوں میں قید فلسطینی اسیران کی مشکلات کو بھی دیکھنا ہوگا۔ ان بے گناہ فلسطینیوں کے ساتھ کیا جانے والا سلوک قیدیوں کے حقوق کی صریح خلاف ورزی ہے۔ مصری صدر نے کہا کہ وہ فلسطینی تنظیموں کے مابین مفاہمت کی حمایت جاری رکھیں گے اور فلسطینیوں کو اپنے مسائل کے حل کے لیے متحد ہونے کی ترغیب دیتے رہیں گے۔ ان کا کہنا تھا کہ تمام فلسطینیوں کو اسرائیل کے خلاف مزاحمت اور اپنے بنیادی مسئلے کے حل کے لیے دیگر پیچیدہ اختلافات کو پس پشت ڈالنا ہو گا۔
بشکریہ: مرکز اطلاعات فلسطین