(فلسطین نیوز۔مرکز اطلاعات) فلسطین کے مقبوضہ مغربی کنارے میں صدر محمود عباس کے زیرکمانڈ پولیس نے ایک چھاپہ مار کارروائی کے دوران اسلامی تحریک مزاحمت ’’حماس‘‘ رہنما سمیت متعدد افراد کو گرفتار کرلیا۔ گرفتار کیے جانے والے شہریوں میں طلباء بھی شامل ہیں۔
رپورٹ کے مطابق عباس ملیشیا نے اتوار کے روزغرب اردن کے شمالی شہر جنین میں حماس رہنما الشیخ ابراہیم نواھضہ کے گھر پرچھاپہ مارا اور انہیں حراست میں لے لیا۔ پچاس سالہ ابراہیم نواھضہ 12 سال تک اسرائیل کی جیلوں میں بھی قید کاٹ چکے ہیں۔عباس ملیشیا کی جانب سے حماس رہنماء کی گرفتاری کی وجہ ظاہر نہیں کی گئی ہے تاہم دوسری جانب حماس نے عباس ملیشیا کے اس اقدام کو انتقامی سیاست کا تسلسل قرار دیتے ہوئے النواھضہ کی فوری رہائی کا مطالبہ کیا ہے۔
عباس ملیشیا کے اہلکاروں نے غرب اردن میں تلاشی کی کارروائیوں میں کئی دوسرے افراد کو بھی حراست میں لے لیا۔
گرفتارکیے جانے والے دوسرے شہریوں میں 21 سالہ انس محمود سلھب نامی ایک فلسطینی طالب علم بھی شامل ہیں جنہیں اخلیل شہرسے حراست میں لیا گیا۔ سلھب کا تعلق حماس کے طلباء ونگ اسلامک بلاک سے بتایا جاتا ہے۔