فلسطین کے مقبوضہ بیت المقدس کے شمال میں قلندیا پناہ گزین کیمپ میں بدھ کے روز فلسطینی شہریوں کی ایک ریلی پرصہیونی فوجیوں نے آنسوگیس کی شیلنگ کے ساتھ براہ راست فائرنگ کی ہے جس کے نتیجے میں اب تک 13 افراد کے زخمی ہونے کی اطلاعات ہیں۔
رپورٹ کے مطابق بدھ کے روز اسرائیلی فوجیوں نے قلندی پناہ گزین کیمپ میں گھر گھر تلاشی کا سلسلہ شروع کیا تو شہری قابض فوج کے خلاف نعرے بازی کرتے ہوئے گھروں سے نکل آئے۔ صہیونی فوجیوں نے احتجاج کرنے والے فلسطینیوں پر بھی فائرنگ کی اور انہیں آنسوگیس کے شیلنگ سے نشانہ بنایا جس کے نتیجے میں تیرہ افراد زخمی ہوئےہیں۔ اسرائیلی فوجیوں نے تلاشی کے دوران 15 سالہ فارس ابو العیش کو حراست میں لے لیا۔مقامی ذرائع کا کہنا ہے کہ اسرائیلی فوج کی فائرنگ، لاٹھی چارج، دھاتی گولیوں کے استعمال اور تشدد کے دیگر حربوں کے نتیجے میں 13 فلسطینی زخمی ہوئے۔ زخمیوں کو رام اللہ کے فلسطین میڈیکل کمپلیکس میں داخل کردیا گیا ہے۔
فلسطینی وزارت صحت نے اسرائیلی فوج کے وحشیانہ تشدد سے تیرہ افراد کےزخمی ہونے کےبعد اسپتال میں لائے جانے کی تصدیق کی ہے اور بتایا کہ بیشتر شہریوں کا جسم لہو لہان ہوچکا ہے۔
ادھر مغربی کنارے کے شہر طوباس میں فلسطینی تھارٹی کے انٹیلی جنس ڈائریکٹر کرنل محمد عبد ربہ کے گھر پربھی چھاپہ مارا۔
عبد ربہ نے بتایا کہ اسرائیلی فوجیوں نے بدھ کو نماز فجر کے وقت ان کے گھر کا دروازہ توڑ کر گھر پردھاوا بولا اور گھر میں موجود ان کے تین بھائیوں نبال، یاسر اور وسام کو حراست میں لے لیا۔ انہوں نے بتایا کہ اسرائیلی فوجیوں نے تلاشی کی کارروائی میں گھر میں موجود قیمتی سامان کی توڑپھوڑ بھی کی۔