لندن (روز نامہ قدس ۔آن لائن خبر رساں ادارہ) برطانوی حزب اختلاف کے رہنما جیرمی کوربن نے اسرائیلی فوجیوں کے ہاتھوں فلسطینیوں کے قتل عام پر کڑی نکتہ چینی کرتے ہوئے حکومت برطانیہ سے مطالبہ کیا ہے کہ وہ اسرائیل کو اسلحہ کی فروخت بند کردے۔
روز نامہ قدس کو موصول ہونے والی اطلاعات کے مطابق اپنے ایک ٹوئیٹ میں جیرمی کوربن کا کہنا تھا کہ اقوام متحدہ کی رپورٹ کے مطابق غزہ میں اسرائیل کے ہاتھوں پرامن مظاہرین کا قتل عام جنگی جرائم کے زمرے میں آسکتا ہے لہذا حکومت برطانیہ کو چاہیے کہ وہ بلا جھجک اس قتل عام کی مذمت اور اسرائیل کو اسلحے کی فراہمی بند کرے۔
جیرمی کوربن کے اس ٹوئیٹ کا بڑے پیمانے پر خیر مقدم کیا گیا اور آٹھ ہزار چار سو سےزائد بار صارفین نے اسے ری ٹوئٹ کیا۔قابل ذکر ہے کہ اقوام متحدہ کے ماہرین نے اٹھائیس فروری کو اپنی ایک رپورٹ میں کہا تھا کہ ایسے شواہد موجود ہیں جن سے پتہ چلتا ہے کہ اسرائیل، حق واپسی مارچ میں شریک فلسطینی مظاہرین کے خلاف جنگی جرائم کا ارتکاب کر رہا ہے۔