ترکی کے وزیرخارجہ احمد داؤد اوگلو نے کہا ہے کہ ان کے ملک کی جاندار خارجہ اور دفاع پالیسیوں نے صہیونی ریاست کو انقرہ کے سامنے جھکنے پر مجبور کر دیا ہے۔ ان کا کہنا ہے کہ اسرائیل اس وقت بدترین عالمی تنہائی کاسامنا کر رہا ہے اور خطے میں اسے کوئی ایک دوست ملک بھی میسرنہیں۔
مرکز اطلاعات فلسطین کےمطابق ترک وزیرخارجہ نے ان خیالات کا اظہار خصوصی بجٹ سیشن کے حوالے سے پارلیمنٹ کے اجلاس سے خطاب میں کیا۔ انہوں نے اپوزیشن کے اس اعتراض کو مسترد کر دیا کہ حکومت مغربی ممالک سے قربت کے بجائے مشرق سے قربت پیدا کر رہی ہے۔ احمد داؤد اوگلو کا کہنا ہے کہ انہوں نے مشرق اور مغرب دونوں اطراف میں تعلقات کو مزید مضبوط کیا ہے۔ اپوزیشن جماعتوں کا یہ اعتراض بے جا ہے۔
ترک وزیرخارجہ کا کہنا تھا کہ خطے کے عرب ممالک میں جاری انقلاب کی تحریکوں میں ان کی حکومت کی صرف ایک ہی پالیسی ہے اور وہ یہ ترک حکومت عوام کے ساتھ ہے۔ جہاں بھی عوام کے جمہوری حقوق کی بات ہو گی ترکی اپنی ہرسطح پر حمایت کرے گا اورخاموش تماشائی کے بجائے عوام کے حقوق کا مقدمہ لڑے گا۔
انہوں نے کہا کہ عرب ممالک میں جاری عوامی تحریکیں استبدادی نظاموں سے نجات اور جمہوریت کے سفر پر گامزن ہیں۔ ترکی ان کی حمایت جاری رکھے گا۔