اسرائیل کے وزیر خزانہ یائیر لبید نے وزیراعظم بنجمن نیتن یاھو کے ساتھ اختلافات شدت اختیار کرنے کے بعد حکومت سے علیحدگی کی دھمکی دی ہے۔ ان کا کہنا ہے کہ اگر فوج کے بجٹ میں کمی اور مزید ٹیکسوں کے معاملے پر نیتن یاھو سے اتفاق رائے پیدا نہ ہوا تو وہ حکومت سے الگ ہو کرقبل ازوقت انتخابات کا مطالبہ کریں گے۔
مرکز اطلاعات فلسطین کے مطابق اسرائیل کی "فیوچر” پارٹی کے رہ نما اور وزیر خزانہ کا کہنا تھا کہ وہ مخلوط حکومت کو ختم نہیں کرنا چاہتے ہیں لیکن جب ان پر مزید ٹیکسوں کے نفاذ کو ختم کرنے کے لیے دباؤ ڈالا گیا تو وہ حکومت سے الگ ہو جائیں گے۔
اپنی پارٹی کے ایک اجلاس سے خطاب کرتے ہوئے وزیر خزانہ نے وزیر داخلہ جدعون ساعر کا سیاست چھوڑنے کے اعلان پر افسوس کا اظہار کیا اور کہا کہ انہیں اپنا سیاسی سفر جاری رکھنا چاہیے تھا۔ مسٹر لبید نے امید ظاہر کی کہ وزیر داخلہ اپنا فیصلہ واپس لیں گے اور سیاسی میدان میں اپنا کام جاری رکھیں گے۔ خیال رہے کہ اسرائیلی وزیر داخلہ نے دو روز قبل ایک بیان میں سیاست چھوڑنے کا اعلان کیا تھا۔
بشکریہ:مرکزاطلاعات فلسطین