اسرائیلی فوجیوں کا الخلیل قصبے پر دھاوا، فلسطینیوں کے سمن جاری

فلسطین سے موصولہ اطلاعات کے مطابق قابض اسرائیلی فوج نے الخلیل کے جنوبی قصبے بیت عمار پر دھاوا بولا اور کارروائی کے دوران علاقے کے رہائشی دو بھائیوں کو چوکی پر حاضری کے سمن جاری کئے۔ گاؤں میں یہودی آباد کاری مخالف عوامی کمیٹی کے ترجمان نے بتایا کہ اسرائیلی فوجی چھاپے کے دوران کئی گھروں میں داخل ہو گئے اور کافی دیر تلاشی کی کارروائی میں مصروف رہے۔ترجمان کے مطابق فوجیوں نے پو پھٹنے سے پہلے ایک شہری ادیب جعفر کے گھر کی مکمل تلاشی لی۔ اس موقع پر فوجیوں نے ان کے دو بیٹوں آدم اور ہیثم کو جنوبی الخلیل میں غوش عتصون فوجی بیرکس میں تفتیش کی غرض سے بلوانے کے لئے سمن جاری کئے۔کمیٹی کے مطابق فوجی کارروائی سے مشتعل ہو کر شہریوں نے فوجیوں پر پتھراؤ کرنا شروع کر دیا جس کا جواب فوجیوں نے آنسو گیس اور چکرا دینے والی گرینڈ فائرنگ سے دیا۔