مرکزاطلاعات فلسطین کے مطابق سنہ 1948 ء کے مقبوضہ علاقوں میں کل منگل کے روز اسرائیلی فوج کی جانب سے خطرے کے سائرن بجائے گئے جس کے بعد یہودی کالونیوں میں موجود یہودی بھاگ کر پناہ گاہوں اور زیرزمین بنکروں میں گھس گئے۔
خیال رہے کہ یہ سائرن کسی خطرے کی علامت نہیں بلکہ جنگی مشقوں کا حصہ تھے اور یہودیوں کو بتایا گیا تھا کہ وہ سائرن بجتے ہی محفوظ مقامات پر منتقل ہوں۔
عبرانی ریڈیو کی رپورٹ کے مطابق خطرے کی سیٹیاں بجتے ہی اسکولوں ، جامعات کے طلباء اور مختلف مقامات پر کام کرنے والے مزدور سب بھاگ کرزمین دوز بنکروں میں پہنچ گئے تھے۔
اسرائیلی ریڈٰیو نے جنگی مشقوں میں شامل سینٹرل کمانڈ کے ایک عہدیدار یوئیل اسٹریک کے حوالے سے بتایا ہے کہ خطرے کے سائرن کسی ہنگامی حالت کا اشارہ نہیں بلکہ شہریوں کو تیار کرنا تھا کہ وہ کسی بھی ہنگامی صورت حال سے کیسے نمٹ سکتے ہیں۔
ادھر اسرائیلی فوج کی ویب سائیٹ پرجاری ایک بیان میں بتایا گیا ہے کہ شمالی فلسطین میں جاری فوجی مشقوں میں فوج کے داخلی محاذ، ایمرجنسی یونٹ، پیشہ وارانہ وزارتیں، مقامی انتظامیہ، ریسکیو ٹیمیں، محکمہ تعلیم اور سول سیکٹر کو بھی شامل کیاگیا ہے۔ بیان میں کہا گیا ہے کہ شمالی فلسطین میں جاری جنگی مشقیں جنگ کے تناظرمیں ہورہی ہیں جن میں فوجیوں کے ساتھ ساتھ یہودی آباد کاروں کو بھی ہنگامی حالات سے نمٹنے کی تربیت دی جا رہی ہے۔
بشکریہ:مرکزاطلاعات فلسطین