فلسطین کے مقبوضہ علاقوں مغربی کنارے اور بیت المقدس سمیت فلسطین کے دوسرے علاقوں میں قابض اسرائیلی فوج کی نہتے شہریوں کے خلاف جاری ریاستی دہشت گردی کے خلاف بہ طور احتجاج جنوبی اور شمالی فلسطینی شہروں میں منگل کے روز شٹرڈاؤن اور پہیہ جام ہڑتال کی گئی۔
رپورٹ کے مطابق منگل کے روز جنوبی اور شمالی فلسطین کے اسرائیل کےزیرقبضہ شہروں الجلیل، شمالی المثلث، جنوبی المثلث، ساحلی شہر اور جزیرہ نما نقب میں نہ صرف کاروبار زندگی معطل رہا بلکہ سڑکوں پر ٹریفک نہ ہونے کے برابر رہی۔ جنوبی اور شمالی فلسطین کے علاقوں میں بہ طور احتجاج تعلیمی ادارے بھی بند رہے۔اندرون فلسطین کے مقامی شہریوں کی نمائندہ سپریم فالو اپ کمیٹی کی جانب سے جاری کردہ ایک بیان میں بتایا گیا ہے کہ منگل کے روز جنوبی فلسطین کے علاقوں میں صہیونی فوج کی ریاستی دہشت گردی کے خلاف اور نصرت مسجد اقصیٰ کے لیے یکجہتی کے طورپرکامیاب ہڑتال کی گئی۔
درایں اثناء مسجد اقصیٰ کے ڈائریکٹر الشیخ عمر الکسوانی نے کہا ہے کہ تیری تحریک انتفاضہ مسلمانوں کے قبلہ اوّل سے نکل پڑی ہے اور اب یہ تحریک اپنے منطقی انجام تک جاری رہے گی۔ انہوں نے کہاکہ "تحریک انتفاضہ القدس” صرف بیت المقدس اور مغربی کنارے میں نہیں بلکہ شمالی اور جنوبی فلسطین اور غزہ کی پٹی کے عوام بھی اس تحریک میں بڑھ چڑھ کر حصہ لے رہےہیں۔
ادھرغزہ کی پٹی میں بھی منگل کے روز اسرائیلی ریاستی دہشت گردی کے خلاف ہڑتال اور احتجاجی مظاہرے کیے گئے۔