اسرائیلی جیل میں زیرحراست مریض اسیر کی حالت تشویشناک

اسلامی تحریک مزاحمت [حماس] نے اسرائیلی جیل میں زیرحراست معذور اور مریض رہ نما جمعہ الجبل فوی رہائی کا مطالبہ کیا ہے۔ حماس کے سابق اسیر رہ نما نزیہ ابوعون کا کہنا ہے کہ جمعہ الجبل صہیونی جیل میں ایک مہلک مرض کے باعث سخت تشویشناک حالت میں مبتلا ہیں۔ عالمی ادارے اس کی رہائی کے لیے فوری مداخلت کریں۔

مرکزاطلاعات فلسطین کے مطابق نزیہ ابو عون کا کہنا ہے کہ ہم صہیونی جیلوں میں اپنے مریض اسیران کی تعداد میں اضافے کے خواہاں ہرگز نہیں بلکہ پہلے سے موجود تمام اسیران کی رہائی اور قیدیوں کی تعداد کم کرنا چاہتے ہیں۔ مریض اسیران کا کیس اب بالکل بند ہونا چاہیے۔ اسرائیل جمعہ الجبل سمیت تمام مریض اسیران کی فوری رہائی کا حکم دے۔

خیال رہے کہ47 سالہ اسیر ابو جبل ایک ٹانگ سے معذور ہیں۔ اس کے علاوہ وہ ہائی بلڈ پریشر[فشار خون]، پیشاب اور سانس کی تکالیف میں بھی مبتلا ہیں۔ انسانی حقوق کے اداروں کا کہنا ہے کہ جمعہ کو فوری طور پر طبی امداد مہیا نہ کی گئی تو اس کی حالت مزید بگڑ سکتی ہے۔