اسرائیلی صدر شمعون پیریز کی جانب سے صہیونی ریاست کے مستقبل کے حوالےسے منعقدہ عالمی سیاسی رہنماؤں کی بارہویں ہرٹزیلیا کانفرنس میں شرکت کے لیے فلسطینی اعلیٰ مذاکرات کارصائب عریقات کو دعوت دی ہے
جو انہوں نے قبول کر لی ہے۔ یہ کانفرنس 29 جنوری سے 02 فروری تک جاری رہے گی جس میں اسرائیل سمیت عالمی سطح کی اسرائیل نواز شخصیات شرکت کریں گی۔
مرکز اطلاعات فلسطین کے مطابق اس سال اسرائیل میں منعقدہ "ہرٹزیلیا” کانفرنس کے لیے”اسرائیل اور مشرق وسطیٰ آندھیوں کی نظر میں” کا عنوان دیا گیا ہے۔ یہ عنوان عرب ممالک میں آنے والے سیاسی انقلابات کے تناظر میں دیا گیا ہے۔
کانفرنس کے منتظمین نے اپنی ویب سائیٹ پر پروگرام میں مدعو کیے گئے عالمی اورعلاقائی رہنماؤں کے نام جاری کیے ہیں۔ فہرست میں فلسطینی اتھارٹی کے اعلیٰ مذاکرات کار صائب عریقات بھی شرکت کریں گے۔
خیال رہے کہ اسرائیل کے زیرتسلط فلسطینی شہر ہرٹزیلیا میں منعقدہ یہ کانفرنس اسرائیل کی سالانہ اہم ترین کانفرنس تصور کی جاتی ہے۔ اس کانفرنس میں اسرائیلی وزیراعظم، صدر،وزیردفاع اور دیگراعلیٰ حکومتی اور سیاسی شخصیات شرکت کرتی ہیں۔
گذشتہ برس ہونے والی اس کانفرنس میں رام اللہ سے فلسطینی صدر محمود عباس کی جماعت فتح کی لیڈر اور مغربی کنارے میں غیرآئینی وزیراعظم سلام فیاض نے شرکت کی تھی۔ یہودیوں کی کانفرنس میں سلام فیاض کی شرکت پر فلسطین کے سیاسی اور مذہبی حلقوں میں شدید ردعمل سامنے آیا تھا اور سلام فیاض پر یہ الزام عائد کیا گیا تھا کہ وہ اسرائیل کی درپردہ حمایت اور فلسطینیوں کے حقوق کی نفی کر رہے ہیں۔