شام(روز نامہ قدس ۔آن لائن خبر رساں ادارہ)اسرائیل کے وزیراعظم بینجمن نیتن یاہو نے زیر قبضہ گولان ہائٹس میں نئے رہائشی علاقے کا نام ’ڈونلڈ ٹرمپ‘ رکھنے کا فیصلہ کرلیا۔
گزشتہ روز سوشل میڈیا پر اپنے بیان میں انکا کہنا تھا کہ ’میں مطلع کرنا چاہتا ہوں کہ ہم نے گولان ہائٹس میں ایک جگہ مختص کرلی ہے جہاں نئی رہائشی کمیونٹی تشکیل دی جائے گی‘ اور اس کا نام امریکی صدر ڈونلڈ ٹرمپ کے نام پر رکھا جائیگا ، رہائشی علاقے کوامریکی صدر کے نام سے منسوب کرنے کی خاطر قانونی منظوری کے لیے اقدامات جاری ہیں۔
امریکی صدر نے ملک کے شام کے علاقے گولان ہائٹس پرغیر قانونی اسرائیلی قبضے کو باضابطہ طور پر تسلیم کرتے ہوئے اس حوالے سے دستاویزات پر دستخط کر دیے تھے جس کے شکر گزاری میں اسرائیلی وزیراعظم نے گولان پہاڑیوں پر تعمیر کرنے والے غیرقانونی کمیونیٹی کا نام امریکی صدر کے نام پر رکھنے کا اعلان کیا ہے
خیال رہے کہ اسرائیل نے 1967 میں 6 روزہ جنگ کے دوران گولان ہائٹس، مغربی کنارے، مشرقی یروشلم اور غزہ کی پٹی پر قبضہ کیا تھا۔
رواں برس مارچ میں سالانہ انسانی حقوق کی رپورٹ میں کہا گیا تھا کہ امریکی محکمہ خارجہ نے لفظ ’اسرائیلی قبضہ‘ کے بجائے ’اسرائیلی کنٹرول‘ استعمال کیا، جو امریکی پالیسی میں واضح تبدیلی کی جانب اشارہ ہے۔