مرکزاطلاعات فلسطین کے مطابق رپورٹ میں بتایا گیا ہے کہ جون میں صہیونی فوج اور پولیس کے ہاتھوں صحافتی حقوق کی 30 خلاف ورزیاں کی گئیں۔
غزہ وزارت اطلاعات کی جانب سے جاری رپورٹ میں بتایا گیا ہے کہ جون میں صہیونی فوجیوں نے فلسطینیوں کے خلاف جارحیت کے دوران 20 بار صحافیوں کو کوریج سے روک کر صحافتی حقوق اور آزادی اظہار رائے کی عالمی قوانین کی خلاف ورزیاں کیں۔
اس کے علاوہ صحافتی حقوق کی دس دوسری خلاف ورزیوں میں صحافیوں کو ڈرانے دھمکانے، ان پرتشدد کرنے، گرفتار کرنے، گھروں پر چھاپے مارنے، قیمتی سامان ضبط کرنے، پیشہ وارانہ فرائض کی انجام دہی میں خلل ڈالنےاور بیرون ملک سفر پرپابندی عاید کرنے جیسے واقعات شامل ہیں۔
رپورٹ میں کہا گیا ہے کہ فلسطین کے مقبوضہ مغربی کنارے میں اسرائیلی فوج کی پابندیوں کے ساتھ فلسطینی اتھارٹی کی انتظامیہ نے بھی آزادی صحافت کا گلہ گھونٹ رکھا ہے۔ پچھلے ماہ فلسطینی اتھارٹی کی پولیس نے صحافیوں زید ابو عرہ، غسان النجاجرہ، موسیٰ الشاعر اور بیمار صحافی بسام امین السائح کو سیکیورٹی مراکز میں طلب کرکےان سے پوچھ گچھ کی مظاہروں کی کوریج کرنے پرانہیں سنگین نتائج کی دھمکیاں دی گئیں۔
بشکریہ:مرکزاطلاعات فلسطین