فلسطین کے مقبوضہ بیت المقدس اور اسرائیل کے دارالحکومت تل الربیع[تل ابیب] میں منگل کے روز فلسطینی مزاحمت کاروں کی چار کارروائیوں کے نتیجے میں کم سے کم تین یہودی آباد کار ہلاک اور 30 سے زائد زخمی ہوئے ہیں۔
اسرائیل کے عبرانی ٹی وی 10 کی رپورٹ کے مطابق پولیس نے فلسطینی مزاحمت کاروں کے انفرادی حملوں میں تین یہودی آباد کاروں کی ہلاکت اور تیس کے زخمی ہونے کی تصدیق کی ہے۔ زخمیوں میں سے چھ کی حالت خطرے میں بتائی جاتی ہے۔ دو مزاحمتی کارروائیوں میں حملہ کرنے والے فلسطینی نوجوان فادی علیان اور بلال غانم نے جام شہادت نوش کیا ہے۔قبل ازیں اسرائیلی اخبار”یدیعوت احرنوت” کی ویب سائیٹ پر پوسٹ کی گئی ایک خبر میں بتایا گیا تھا کہ بیت المقدس میں شاہراہ ملوک اسرائیل پر بس کی ٹکر اور فائڑنگ سے دو یہودی آباد کار ہلاک اور 17 زخمی ہوئے تھے۔
عبرانی اخبار نے منگل کو فلسطینی مزاحمت کاروں کی دو گھنٹے میں چار کارروائیوں کے سبب "خوف کا دن” قرار دیا۔
شہید ہونے والے ایک نوجوان بلال غانم القدس یونیورسٹی میں حماس کے طلباء ونگ اسلامک بلاک کے سرگرم کارکن تھے۔ ان کی والدہ جبل مکبر سے جب کہ والد جنین سے تعلق رکھتے تھے۔ شہید غانم نے اسرائیلی جیل میں 14ماہ قید بھی کاٹی تھی۔