یمن کے صہیونی شہروں میں اہم اہداف پر ڈرون حملے

(روزنامہ قدس ـ آنلائن خبر رساں ادارہ) یمنی مسلح افواج نے اعلان کیا ہے کہ منگل کی شب قابض اسرائیل میں متعدد اہم تنصیبات کو نشانہ بنانے کے لیے کئی ڈرون حملے کیے گئے۔

یمنی مسلح افواج کے ترجمان یحییٰ سریع نے ایک ویڈیو بیان میں کہا کہ حوثی فضائیہ نے چھ ڈرونز کے ذریعے چار فوجی آپریشنز کیے جن میں حائفہ، النقب، ام الرشراش (ایلات) اور بئر السبع میں قابض اسرائیل کے اہم اہداف کو کامیابی سے نشانہ بنایا گیا۔

یحییٰ سریع نے واضح کیا کہ یہ کارروائیاں فلسطینی عوام کی حمایت اور غزہ میں قابض اسرائیل کی جانب سے جاری نسل کشی اور بھوک پر مبنی مجرمانہ پالیسیوں کے جواب میں کی جا رہی ہیں۔ انہوں نے کہا کہ یہ حملے اس وقت تک جاری رہیں گے جب تک غزہ پر جارحیت ختم نہیں ہو جاتی اور محاصرہ نہیں اٹھا لیا جاتا۔

ترجمان نے خبردار کیا کہ اگر قابض اسرائیل فلسطینی جدوجہد کو ختم کرنے کے اپنے منصوبے پر عمل کرتا رہا تو اس کے سنگین اثرات دیگر عرب اور اسلامی ممالک پر بھی پڑیں گے۔

یہ حملہ جمعہ کو کیے گئے ان حملوں کے بعد ہوا ہے جن میں تل ابیب کے قریب بن گوریون ایئرپورٹ اور بئر السبع و عسقلان میں اہم تنصیبات کو نشانہ بنانے کا دعویٰ کیا گیا تھا۔ یمنی افواج، جو انصار اللہ (حوثی) تحریک کے زیر انتظام ہیں غزہ کی حمایت میں قابض اسرائیل پر مسلسل میزائل اور ڈرون حملے کر رہی ہیں اور اس سے وابستہ بحری جہازوں کو بھی نشانہ بنا رہی ہیں۔