(روزنامہ قدس ـ آنلائن خبر رساں ادارہ) امریکہ کے ایوانِ کانگریس کے متعدد اراکین نے جمعہ کی شب ایک مشترکہ بیان میں غزہ کی موجودہ انسانی صورتحال کو انتہائی افسوسناک، لرزہ خیز اور ناقابلِ قبول قرار دیا ہے۔
اراکین نے کہا کہ غزہ میں انسانی امداد کی ترسیل نہ صرف انتہائی مشکل بلکہ جان لیوا بن چکی ہے جس کے نتیجے میں اب تک تقریباً سات سو بے گناہ فلسطینی امداد کے انتظار میں شہید ہو چکے ہیں۔
انہوں نے سوسے زائد غیر سرکاری تنظیموں کے انتباہ کا حوالہ دیتے ہوئے کہا کہ غزہ میں قحط تیزی سے پھیل رہا ہے اور فوری اقدامات نہ کیے گئے تو حالات بدترین انسانی سانحے میں بدل سکتے ہیں۔
بیان میں قابض اسرائیلی حکومت کے جنگی جرائم کے مُرتکب سربراہ بنجمن نیتن یاہو کی پالیسیوں کو شدید تنقید کا نشانہ بناتے ہوئے کہا گیا کہ ان کی وجہ سے غزہ کی پچہتر فیصد آبادی ہولناک فاقہ کشی کا سامنا کر رہی ہے۔
بیان میں کہا گیا کہ غزہ پر فوجی جارحیت کا دائرہ وسیع کرنا امدادی سرگرمیوں کو خطرے میں ڈال رہا ہے۔کانگریس اراکین نے زور دے کر کہا کہ غزہ کے مستقبل کے حوالے سے کسی حکمت عملی کا فقدان ایک سنگین اور ناقابلِ معافی غلطی ہے جس کے نتائج نہ صرف فلسطینی عوام بلکہ عالمی امن کے لیے بھی مہلک ہو سکتے ہیں۔
