اسرائیلی ذرائع ابلاغ نے اپنی رپورٹس میں بتایا ہے کہ فلسطین کے مقبوضہ بیت المقدس شہر میں ایک فلسطینی شہری نے اپنی کار یہودی فوجیوں پر چڑھا دی جس کے نتیجے میں کم سے کم دو فوجی زخمی ہوگئے ہیں۔
عبرانی نیوز ویب پورٹل”وللا” نے اپنی رپورٹ میں بتایا ہے کہ یہ واقعہ اس وقت پیش آیا جب مشرقی بیت المقدس میں قائم "معالیہ ادومیم” یہودی کالونی کے باہر الزعیم چوکی کےقریب لگائے گئے ناکے پر کھڑی فوجیوں کو فلسطینی کی کار نے ٹکر دے ماری۔اسرائیلی فوجیوں نے فوری طورپر کار پر فائرنگ کردی جس کے نتیجے میں اس کا 30 سالہ ڈرائیور شدید زخمی ہوا ہے۔ اسے شعاری زیدیک” نامی اسپتال میں منتقل کیا گیا ہے جہاں اس کی حالت خطرے سے باہر بیان کی جاتی ہے۔ تاہم کار کی ٹکر سے یہودی فوجیوں کو گہرے زخم آئے ہیں۔
قبل ازیں اسرائیلی ٹیلی ویژن چینل 10 نے اپنی رپورٹ میں بتایا تھا کہ فلسطین کے مقبوضہ مغربی کنارے اور بیت المقدس میں فلسطینی شہریوں کی جانب سے یہودی آباد کاروں پر چاقوں سے حملوں کے بعد گاڑیوں کے ذریعے کچلے جانے کے واقعات رونما ہوسکتے ہیں۔