اسرائیلی حکام مقبوضہ مغربی کنارے میں اسلامی تحریک مزاحمت [حماس] کے قائدین کی گرفتاریوں کا سلسلہ جاری رکھے ہوئے ہیں۔ پیر کے روز چھے فلسطینی شہریوں کو نابلس اور رام اللہ سے حراست میں لیا گیا ہے۔
مقامی ذرائع نے بتایا کہ صہیونی فوجیوں نے نابلس کے جنوبی گاؤں عصیرہ پر چھاپہ مار کارروائی کے دوران حماس کے رہنما الشیخ ضرار حمادنہ کو حراست میں لے لیا۔ اسرائیلی فوجیوں نے نابلس ہی کی مغربی میونسپلٹی سے تحریک کے سرگرم کارکن زاھر موسی کو گرفتار کر لیا۔
قابض فوجیوں نے غرب اردن کے مرکزی شہر رام اللہ سے حال ہی میں رہائی پانے والے 32 سالہ انس شحادہ الکسوانی کو بھی گرفتار کر لیا۔ گرفتاری ام الشرایط میں شحادہ کے گھر چھاپے کے بعد عمل میں آئی۔
تین فلسطینی شہریوں کو شمالی الاغوار کی الحمر چیک پوسٹ پر اسرائیلوں نے گرفتار کر کے انہیں نامعلوم مقام پر منتقل کر دیا۔ صہیونی حکام نے چیک پوسٹ عمومی آمد و رفت کے لئے اچانک بند کر کے علاقے کی تلاشی شروع کر دی۔
بشکریہ:مرکز اطلاعات فلسطین