مقبوضہ بیت المقدس مرکزاطلاعات فلسطین
اسرائیل میں یہودیوں کے مذہبی تہوار”عید الغفران” کے موقع پر قابض صہیونی فوج اور پولیس کی بھاری تعداد نے مسجد اقصیٰ کو اپنے محاصرے میں لے کرفلسطینی شہریوں کے قبلہ اول میں داخلے
پرپابندی عاید کردی ہے۔ دوسری جانب یہودیوں کی بڑی تعداد ٹولیوں کی شکل میں قبلہ اول میں داخل ہو کر مقدس مقام کی بے حرمتی کا سلسلہ جاری رکھے ہوئے ہے۔عینی شاہدین نے مرکزاطلاعات فلسطین کو بتایا کہ یہودیوں کے مذہبی تہوار”عید الغفران” کے موقع پر بدھ کو علی الصباح اسرائیلی فوج اور پولیس نے قبلہ اول کو محاصرے میں لے فلسطینی شہریوں کی قبلہ اول تک رسائی پرپابندی عاید کردی تھی۔
عینی شاہدین کا کہنا ہے کہ اسرائیلی فوج اور پولیس کی بھاری نفری دیوار براق، پرانے بیت المقدس اور مسجد اقصیٰ کے اطراف میں مسلح گشت کررہی ہے۔ کسی فلسطینی شہری کو مسجد اقصیٰ میں داخل ہونے کی اجازت نہیں جب کہ یہودیوں کو باب السلسلہ اور مراکشی دروازے کے راستے حرم قدسی میں داخل ہونے کی اجازت دی گئی ہے۔
خیال رہے کہ اسرائیل میں عبرانی سال کے آغاز کے 10 دن کے بعد "یوم الغفران” کے نام سے ایک تہوار منایا جاتا ہے۔ اس روز یہودی دن کو روزہ رکھتے ہیں اور معابد میں جا کر مذہبی رسومات ادا کرتے ہیں۔