یونیسیف: غزہ میں گیارہ لاکھ بچے صہیونی جارحیت سے شدید صدمے میں مبتلا

(روزنامہ قدس ـ آنلائن خبر رساں ادارہ) اقوام متحدہ کے بچوں کے حقوق کے نگران ادارے یونیسیف نے خبردار کیا ہے کہ قابض اسرائیل کی مسلسل جارحیت نے غزہ کے بچوں کی زندگی کو ایک خوفناک اور دائمی تباہی میں تبدیل کر دیا ہے۔ گزشتہ تئیس مہینوں سے جاری یہ نسل کشی بچوں کے روزمرہ کے معمولات کا حصہ بن چکی ہے اور ان کے ذہنی و جذباتی سکون کو شدید طور پر متاثر کر رہی ہے۔

یونیسیف کے مشرقِ وسطیٰ اور شمالی افریقہ میں ایڈووکیسی اور میڈیا کے ڈائریکٹر عمار عمار نے بتایا کہ غزہ پر قابض اسرائیل کی بمباری اور تشدد نے نہ صرف بچوں کو شہید اور زخمی کیا ہے، بلکہ تقریباً گیارہ لاکھ بچوں میں گہرے ذہنی صدمات بھی پیدا کیے ہیں جو ان کی نفسیاتی نشوونما کے لیے انتہائی نقصان دہ ہیں۔

انہوں نے بتایا کہ اس عرصے میں بچوں کے بنیادی حقوق کی خلاف ورزیاں عام ہو گئی ہیں جن میں امداد سے محرومی، مسلسل بھوک، جبری نقل مکانی، اور اسکولوں، اسپتالوں، پانی کے نظام اور گھروں کی تباہی شامل ہیں جو اب بچوں کے لیے روزمرہ کا معمول بن چکی ہیں۔

عمار نے مزید کہا کہ غزہ میں جو کچھ ہو رہا ہے وہ صرف بچوں کے خلاف جنگ نہیں بلکہ زندگی کے بنیادی ڈھانچے کو تباہ کرنے کی ایک مہم ہے، جس میں نصف ملین سے زائد افراد شدید بھوک اور غذائی قلت کا شکار ہیں جبکہ اس سے ہونے والی شہادتوں کو روکا جا سکتا تھا۔

انہوں نے شہادتوں کے دلخراش مناظر کی طرف بھی اشارہ کیا جن میں کمزور اور نوزائیدہ بچے بھوک اور بیماری کے باعث زندگی کی بازی ہار گئے اور اس صدماتی صورتحال کو روکنے کے لیے کوئی مؤثر اقدام نہیں کیا گیا۔

یونیسیف نے خبردار کیا کہ بچوں میں غذائی قلت کی شرح خطرناک حد تک بڑھ رہی ہے۔ صرف جولائی میں ہی بارہ ہزار سے زائد بچوں کو شدید غذائی قلت کا سامنا کرنا پڑا اور ہر چار میں سے ایک بچہ شدید ترین غذائی قلت میں مبتلا تھا، جس کے اثرات قریبی اور طویل مدتی دونوں سطحوں پر بچوں کی زندگی کے لیے تباہ کن ہیں۔

عمار نے واضح کیا کہ یونیسیف علاقے میں اپنی سرگرمیاں تیز کر رہا ہے تاہم خوراک، بنیادی ضروریات اور طبی امداد کی ترسیل تکنیکی مشکلات اور قابض اسرائیل کی عائد کردہ پابندیوں کی وجہ سے انتہائی مشکل ہو رہی ہے۔