کولمبیا کا اعلان: منشیات فروشوں سے ضبط سونا غزہ کو دیا جائے گا

(روزنامہ قدس ـ آنلائن خبر رساں ادارہ) کولمبیا کے صدر گستا وو پیٹرو نے منشیات فروشوں سے ضبط کیا گیا سونا فلسطینیوں کی مدد کے لیے غزہ بھیجنے کا اعلان کردیا۔

کولمبین صدر نے سوشل میڈیا پر جاری پیغام میں کہا کہ یہ سونا جنگ سے متاثرہ فلسطینی بچوں کے علاج اور غزہ کی تعمیر نو کے لیے استعمال کیا جائے گا۔ صدر پیٹرو نے اس اقدام کو انسانیت اور عالمی یکجہتی کی مثال قرار دیدیا۔

ان کا کہنا تھا کہ وہ انسانیت کی بنیاد پر فلسطینی عوام کے ساتھ کھڑے ہیں اور اس مشکل گھڑی میں غزہ کی مدد کے لیے عملی اقدامات کریں گے۔انہوں نے غزہ کی تعمیر نو اور بحالی کےلیے عالمی فورس بنانے سے متعلق اقوامِ متحدہ میں قرار داد پیش کرنےکا بھی اعلان کردیا۔

یاد رہےکہ صدر گستاوو پیٹرو فلسطین کے حامی سمجھے جاتے ہیں وہ ماضی میں بارہا سفاک و قاتل صہیونی فوجی کارروائیوں اور انسانی حقوق کی خلاف ورزیوں پر سخت تنقید کر چکے ہیں۔

کولمبیا نے گزشتہ سال درجنوں زخمی فلسطینی بچوں کو طبی امداد کے لیے بوگوٹا کے اسپتالوں میں علاج کی سہولت بھی فراہم کی تھی۔