(روزنامہ قدس ـ آنلائن خبر رساں ادارہ) کولمبیا کے صدر گستاوو پیٹرو نے مطالبہ کیا ہے کہ فلسطین کو بچانے اور قابض اسرائیل کے مظالم کو روکنے کے لیے ایک عالمی فوج تشکیل دی جائے غزہ میں جاری صہیونی درندگی پر محض مذمت اور بیانات دینا اب کافی نہیں رہا۔
پیٹرو نے ٹی وی انٹرویو میں کہا کہ دنیا کے کئی ممالک نے ایسی فوج میں شمولیت کے لیے آمادگی ظاہر کی ہے جو فلسطینی عوام کو قابض اسرائیل کے ظلم و قتل عام سے نجات دلانے میں مددگار ثابت ہو۔انہوں نے کہا کہ بین الاقوامی فوجداری عدالت کے ذریعے نسل کشی کے مرتکب صہیونی مجرموں کا محاسبہ کیا جانا ناگزیر ہے اور اب وقت آ گیا کہ طاقت کا مظاہرہ کیا جائے تاکہ انصاف کو یقینی بنایا جا سکے۔
کولمبیا کے صدر نے کہا کہ دنیا کی اکثریت غزہ پر مسلط جنگ کے خاتمے کا مطالبہ کر رہی ہے مگر موجودہ پالیسیاں عالمی انصاف کے راستے میں رکاوٹ ہیں۔انہوں نے سلامتی کونسل کے نظامِ انتخاب میں تبدیلی کی ضرورت پر بھی زور دیا تاکہ ایک ملک پوری دنیا پر اپنی مرضی نہ تھوپ سکے۔
انہوں نے اپنی گفتگو میں قطر پر قابض اسرائیل کے حملوں کی بھی مذمت کی اور دوحہ کے ساتھ مکمل یکجہتی کا اعلان کیا۔پیٹرو نے بعض یورپی ممالک اور بڑی عالمی کمپنیوں کے غاصب اسرائیل نوازی رویے کو منافقت قرار دیتے ہوئے کہا کہ وہ کھلے عام قابض اسرائیل کے جنگی جرائم کی پشت پناہی کر رہے ہیں۔
