ڈاکٹرز ود آؤٹ بارڈرز: غاصب اسرائیل نسل کشی کے گواہوں کو نشانہ بنا رہا ہے

(روزنامہ قدس ـ آنلائن خبر رساں ادارہ) انسانی خدمت کی عالمی تنظیم "ڈاکٹرز ود آؤٹ بارڈرز” نے غاصب اسرائیل کے طیاروں کی جانب سے ناصر میڈیکل کمپلیکس پر کیے گئے دو ہولناک حملوں کی شدید مذمت کی ہے، جن میں صحافیوں، امدادی کارکنوں اور طبی عملے سمیت بیس فلسطینی شہید ہوئے۔ تنظیم نے کہا کہ قابض اسرائیل ان افراد کو دانستہ طور پر نشانہ بنا رہا ہے جو فلسطینی نسل کشی کے واحد زندہ گواہ ہیں۔

تنظیم کے ہنگامی امور کے کوآرڈینیٹر جیروم گریمو نے بتایا کہ شہید ہونے والوں میں صحافیہ مریم ابو دقہ بھی شامل تھیں جو ماضی میں کئی بار ڈاکٹرز ود آؤٹ بارڈرز کے ساتھ کام کر چکی تھیں۔ انہوں نے کہا آج اس المیے کے بعد مریم کا بیٹا اپنی ماں سے محروم ہو گیا ہے۔

گریمو نے انکشاف کیا کہ قابض اسرائیل کی اندھا دھند بمباری کے دوران، ڈاکٹرز ود آؤٹ بارڈرز کے کئی اراکین کو اپنی جان بچانے کے لیے ایک لیبارٹری میں پناہ لینی پڑی جبکہ باہر زخمیوں کو نکالنے کی کوششیں جاری تھیں۔

انہوں نے کہا کہ انہیں اس بات پر شدید غصہ ہے کہ قابض اسرائیل کھلے عام صحافیوں اور طبی عملے کو قتل کر رہا ہے اور اس کے باوجود اس کے جرائم پر کوئی روک ٹوک نہیں۔ گریمو کے مطابق گزشتہ بارہ مہینوں میں قابض اسرائیل نے منظم طریقے سے ہسپتالوں کو تباہ کیا، صحافیوں کو خاموش کرنے کے لیے ان پر حملے کیے اور طبی کارکنوں کو ملبے تلے دفن کر دیا۔

انہوں نے عالمی برادری سے مطالبہ کیا کہ غزہ میں جاری نسل کشی کو روکا جائے اور قابض اسرائیل کو اس کے جنگی جرائم پر انصاف کے کٹہرے میں لایا جائے۔ ان کا کہنا تھا کہ جب تک جابر ریاست اسرائیل بین الاقوامی قوانین کی کھلی خلاف ورزی کرتا رہے گا تب تک نسل کشی کے ان جرائم کے گواہوں کو جان بوجھ کر نشانہ بنایا جاتا رہے گا۔ انہوں نے مزید کہا "اب بہت ہو چکا۔”

واضح رہے کہ کل پیر کی صبح قابض اسرائیلی طیاروں نے غزہ کے جنوبی علاقے میں واقع ناصر میڈیکل کمپلیکس کے اندر یاسین بلاک پر بمباری کی جس کے نتیجے میں بیس افراد شہید ہوئے، جن میں صحافی اور سول ڈیفنس کے اہلکار بھی شامل تھے۔

اس ابتدائی بمباری کے بعد جب امدادی کارکن اور صحافی ملبے تلے دبے زخمیوں اور لاشوں کو نکالنے میں مصروف تھے تو قابض اسرائیل نے اسی مقام پر دوسرا حملہ کر کے ایک خونریز قتل ِعام کیا جس میں درجنوں افراد شہید اور زخمی ہوئے۔