مرکز اطلاعات فلسطین کے مطابق اسرائیل کے ایک سیکیورٹی ذریعے نے عبرانی نیوز ویب پورٹل "وللا” کو بتایا کہ راکٹ حملہ شام کے اندر سے صدر بشارالاسد کے ایک فوجی اڈے سے داغا گیا جسے حزب اللہ کے جنگجووں نے اسرائیل پر داغا۔
ذرائع نے بتایا کہ شام کی جانب سے اسرائیلی تنصیبات پر چار راکٹ داغے گئے تھے تاہم ان میں سے ایک اسرائیلی فوجی تنصیبات کے قریب گرا ہے۔ اسرائیل میں گرنے والا راکٹ 177 ملی میٹر دھانے کی توپ سے داغا گیا ہے۔
شام سے راکٹ حملے کے جواب میں اسرائیلی فوج نے شام کے اندر20 مارٹر گولے پھینکے۔
خیال رہے کہ دو ہفتے قبل اسرائیل نے شام کے سرحدی شہر القنیطرہ میں فضائی حملہ کرکے حزب اللہ کے چھ اہم رہ نماوں کو شہید کردیا تھا جس کے جواب میں حزب اللہ نے اسرائیل کو سبق سکھانے کی دھمکی دی تھی۔ اسرائیلی فوجی ذرائع کا کہنا کہ گذشتہ روز کا راکٹ حملہ حزب اللہ کی اپنے ارکان کی شہادت کے خلاف جوابی کارروائی ہوسکتی ہے۔
گذشتہ روز مقبوضہ وادی گولان میں ایک راکٹ حملہ ہوا تھا تاہم اس میں کسی قسم کا جانی نقصان نہیں ہوا ہے۔
بشکریہ:مرکزاطلاعات فلسطین