اسرائیلی فوج نے مقبوضہ مغربی کنارے کے نواحی فلسطینی علاقے وادی اردن میں سات فلسطینی خاندانوں کو اپنے گھر خالی کرنے کے نوٹسز جاری کیے ہیں۔ اطلاعات کے مطابق صہیونی حکام کی جانب سے فلسطینی خاندانوں سے کہا گیاہے کہ وہ فوری طورپر مکانات خالی کریں تاکہ مکانات کومسمار کیا جاسکے۔
وادی المالح کے ایک مقامی فلسطینی سماجی کارکن عارف دراغمہ نے بتایا کہ وسطی وادی اردن میں فصائل کے مقام پر واقع سات مکانات کے خالی کرنےاور انہیں مسمار کرنے کے احکامات جاری کیے گئے ہیں۔ انہوں نے بتایا کہ صہیونی حکام کا کہنا ہے کہ یہ مکانات حکومت کی اجازت کے بغیر تعمیر کیے گئے ہیں اس لیے انہیں فوری طورپر مسمار کیا جائے گا۔ یہ ساتوں مکانات اعبیات، ابو الخرابیش اور زاید نامی خاندانوں کی ملکیت بتائے جاتےہیں۔
خیال رہے کہ صہیونی فوج کی جانب سے فلسطینیوں کے مکانات کی مسماری کا یہ پہلا واقعہ نہیں۔ اس علاقے میں دو ماہ قبل اسرائیلی فوج نے فلسطینی شہریوں کے کئی مکان اور ان کی جھونپڑیاں مسمار کردی تھیں۔