مصر کے وزیراعظم ڈاکٹر ھشام قندیل آج جمعہ کے روز مختصر دورے پر جنگ زدہ فلسطینی ساحلی شہرغزہ کی پٹی میں پہنچے ہیں۔ مصری وزیراعظم ایک اعلیٰ سطحی وفد کے ہمراہ جمعہ کو علی الصباح رفح بارڈر کے راستے غزہ داخل ہوئے۔
رفح بارڈر پر فلسطینی کابینہ میں شامل کئی وزراء اور اراکین قانون ساز کونسل نے مصری وزیراعظم کا استقبال کیا۔ انہیں ایک قافلے کی شکل میں غزہ کی پٹی میں وزیراعظم ہاؤس لایا گیا جہاں ان کی وزیراعظم اسماعیل ھنیہ سے ملاقات اور گفتگو ہوئی۔ دونوں رہ نماؤں کے درمیان اسرائیلی فوج کی دہشت گردی کے بارے میں تبادلہ خیال ہواْ۔ اسماعیل ھنیہ نے اپنے مصری ہم منصب کو شہر کی سیکیورٹی کی صورت حال سے آگاہ کیا۔
بعد ازاں مصری وزیراعظم نے صہیونی فوج کے حملوں سے زخمی شہریوں کی عیادت کی اور جنگ سے ہونے والی تباہ کاریوں کا جائزہ لیا۔ اس موقع پر صحافیوں سے گفتگو کرتے ہوئے مصری وزیراعظم ڈاکٹر قندیل کا کہنا تھا کہ وہ فلسطینیوں کو صہیونی جبر کے سامنے تنہا نہیں چھوڑیں گے۔ انہوں نے تمام فلسطینی گروپوں پر زور دیا کہ وہ آپس میں اتحاد پیدا کریں۔
خیال رہے کہ مصری وزیراعظم ڈاکٹر ھشام قندیل آج جنگ سے متاثرہ فلسطینی شہرغزہ کی پٹی میں پہنچے ہیں، جبکہ صدر ڈاکٹر محمد مرسی کل ہفتے کے روز غزہ کا دورہ کریں گے۔
بشکریہ: مرکز اطلاعات فلسطین